Mu kiganiro n’abanyamakuru kuwa gatatu tariki 06/03/2013, MTN yavugaga ko telefone ya Blackberry ifite servisi z’umwihariko w’uko abantu bayitunze bashobora kwandikirana bavugana muri ako kanya (chatting &messenger).

Iyi telefone kandi ngo ishoboye gukoreshwa mu bushakashatsi hakoreshejwe imbuga ziranga izindi (browsers) nka google, yahoo, wikipedia n’izindi, ndetse no guhuza abantu benshi hakoreshejwe imbuga mpuzambaga zirimo facebook, twitter, foursquare na linkedlin.

Abayobozi banyuranye ba MTN Rwandacell mu kiganiro n’abanyamakuru.

Telefone ya blackberry kandi ishoboye gushyirwamo porogoramu z’ikoranabuhanga zinyuranye zikora ku nyandiko, amajwi n’amashusho, aho yohereza (upload), ikakira (download), ikandikirwaho ndetse ikanasomerwaho amakuru ari mu nyandiko z’ubwoko bwinshi (ms office), nk’uko MTN ikomeza iyitaka.

Robert Rwakabogo ushinzwe amasoko muri MTN ati: “Blackberry ntabwo ari iyo guhamagara, kwitaba no kwandikirana ubutumwa bugufi gusa”. Yavuze ko servisi ziba muri Blackberry ziri mu byiciro byishyurwa amafaranga y’u Rwanda ibihumbi umunani na bitanu ku kwezi, hamwe na 2,500, cyangwa 1,500 ku cyumweru, bitewe n’ubwinshi bwa serivisi umukiriya yaguze.

Umuyobozi wa MTN Rwandacell, Khaled Mikkawi anamenyesha abafatabuguzi b’iyi sosiyete ko hari amahirwe ku muntu wese uguze SIMcard nshya cyangwa umaze igihe kirenga iminsi 30 atari ku murongo wa telefone, akaba agomba guhabwa amafaranga 250 y’ubuntu akimara kujya ku murongo bundi bushya.

Abo bafatabuguzi bashya kandi ngo bagomba guhabwa amafaranga 100 buri cyumweru, ndetse bagakoresha amafaranga 10 ku munota, iyo bahamagaye abantu batatu b’ingenzi mu nshuti cyangwa abo bafitanye isano.

Simon Kamuzinzi