Nk’uko byasobanuwe na Ministiri w’imari n’igenimigambi, Amb. Claver Gatete uri mu bashyize umukono ku masezerano y’inkunga, ngo ayo mafaranga azafasha ahanini mu kubaka ubushobozi bw’abakozi muri Ministeri y’umutungo kamere (MINIRENA) n’ikigo gishinzwe kubungabunga ibidukikije (REMA).

Yavuze ko hari n’igice kizakoreshwa mu gushyiraho amategeko na gahunda ahanini zijyanye n’ubucukuzi bw’amabuye y’agaciro.

Igice kinini cy’ayo mafaranga ngo kizashyirwa mu kigega cyo kwita ku bidukikije no guhangana n’ingaruka z’imihindagurikire y’ibihe (FONERWA), hagamijwe gushyira mu bikorwa gahunda y’imbaturabukungu ya EDPRS2, nk’uko Ministiri muri Ministeri y’imari n’igenamigambi (MINECOFIN) yasobanuye.

Amasezerano kandi agena ko hari amafaranga azakoreshwa mu guhemba abatagira amikoro, bazakora imirimo yo gusubiranya indiri z’urusobe rw’ibinyabuzima; ndetse no gushyiraho uburyo imirimo y’abantu yajya ikorwa hatabayeho kwangiza ibidukikije mu turere twa Nyamasheke, Bulera na Musanze.

Imishinga izakorwa yo kwita ku bidukikije ngo yamaze gutegurwa, ikaba igomba guhita ishyirwa mu bikorwa, nk’uko Ministiri w’umutungo kamere, Stanislas Kamanzi yabisobanuye.

Miliyoni 400 z’amadolari nizo amashami y’umuryango w’abibumbye (UN) akorera mu Rwanda yageneye gushyigikira gahunda y’imbaturabukungu ya EDPRS2, nk’uko uhagarariye UN mu Rwanda, Lamin Manney yasobanuye ko muri uyu mwaka hamaze gutangwa agera kuri miliyoni 106 z’amadolari y’Amerika; ndetse yizeza ko asigaye azatangwa mu gihe cya vuba.

Amashami y’umuryango w’Abibumbye akorera mu Rwanda ngo niyo muterankunga w’igihugu ukomeye, kuva mu mwaka ushize ubwo yatangiye gufasha u Rwanda yibumbiye hamwe, nk’uko Lamin Manney yabitangaje.

Manney avuga ko UN mu Rwanda itanga inkunga mu byiciro binyuranye bigenga ubuzima bw’igihugu, harimo kuzamura ubukungu, guteza imbere demokarasi hamwe no gushyigikira gahunda zo guhindura imibereho y’abaturage.

Simon Kamuzinzi