Imwe mu mishinga yo kubungabunga urusore rw’ibinyabuzima mu Karere ka Ruhango, irimo amashyamba aterwa mu mushinga ‘Green Amayaga’, ushinzwe kongera gusubiranya amashyamba, yangijwe n’ibikorwa bya muntu bigatuma hatangira kuba ubutayu.

Umukozi w’Ikigo cy’Igihugu gishinzwe kubungabunga ibidukikije (REMA), ukurikirana ibikorwa by’Umushinga Green Amayaga, Nsengiyumva Augustin, avuga ko hari ibikorwa abaturage bakorerwa ariko ntibabigire ibyabo bikangirika vuba.

Agaragaza ko nyamara muri uko kwangirika n’abaturage ubwabo bashobora kubihomberamo, cyangwa kubiburiramo ubuzima, urugero rubari hafi akaba ari ibiherutse kubera mu Turere tw’Intara y’Amajyaruguru n’Iburengerazuba, aho ibiza byahitanye abantu basaga 130.

Agira ati “Si ngombwa ko abantu batangira gukora impinduka kubera ko bababaye, urafata imbaraga zawe ugahinga ugafumbira, bugacya byose byagiye isuri yabitwaye. Amazi umunsi ku wundi yangiza umurima wawe ubireba ntugire icyo uko, nyamara ibyo twumvise mu Iburengerazuba na hano byahaba njyewe nawe turangaye, ubuzima bwacu bushobora kwangirika”.

Asaba abaturage kwita ku bikorwa begerejwe, bakabibangikanya n’indi mishinga ikeneye guterwa inkunga, kugira ngo ibafashe kubateza imbere maze na bya bidukikie birindwe kwangizwa, ahubwo bifashe abaturage kugira ubuzima bwiza.

Umuyobozi w’umushinga APEFA wafashije guterera ibiti abaturage, Nzabonimpa Oscar, avuga ko imbuto nyinshi ziribwa mu Rwanda zituruka hanze, nyamara mu Rwanda naho zahera ariko umuturage bazimuterera ntaziteho, agakomeza gutakaza amafaranga ajya kuzigura.

Avuga ko nubwo hari ibyo abaturage bagerageza gufata neza, hari n’ibindi barebera byangirika nk’imirwanyasuri, ibiti byera imbuto n’amashyamba, kandi bifashwe neza byakura abaturage mu bukene.

Agira ati “Dukeneye ko muva mu bukene, biriya biti babaterera byabakiza, ariko hari abavuga ngo avoka n’imyembe ntibyabakiza nyamara mubitakazaho amafaranga mujya kubihaha. Ibi bikorwa nimutabigira ibyanyu nyuma y’imyaka ibiri nta gikorwa kizaba kigihari, ahubwo uzasanga mwarasubiye aho mwavuye, ya mafaranga yashowemo yapfuye ubusa”.

Mu rwego rwo gukomeza gufasha abaturage kurwanya isuri hirindwa ibiza, ubuyobozi bw’Akarere n’abafatanyabikorwa bako mu kubungabunga urusobe rw’ibinyabuzima, bakoreye umuganda wo gusibura imirwanyasuri mu Murenge wa Mbuye, ahasibuwe ku uso bwa hegitari enye.