Bamwe mu basheshe akanguhe bemeza ko ibiza n’ibyago bimaze kwiyongera muri iki gihe bishobora kwirindwa cyangwa abantu bagahangana nabyo.

Abakurambere ngo babashaga kumenya ibimenyetso by’igihe imvura yabaga yegereje kugwa, ubwinshi bwayo, ndetse no gutangira kw’impeshyi; nk’uko Umusaza Ngarambe w’imyaka 73 asobanura.

NgarambeTheodore wo mu karere ka Kicukiro.

Ukwezi kwa cyenda (Nzeri) ni ko kwabaga ari ukwa mbere mu mwaka, ubwo impeshyi yabaga irangiye imvura y’umuhindo itangiye. Basohoraga amasuka, bakabiba amasaka n’uburo, bagafumbira (bagatera) inzuzi, imbwija, ibishyimbo n’ibindi.

Barebaga ukwezi mu kirere babona kutagaragara neza bakamenya ko imvura ihari mu kirere kandi ari nyinshi, ku buryo yamaraga amezi atatu itaracika.

Bapimaga icyerekezo cy’umuyaga mu gutwika ibintu ku gasozi, babona umwotsi werekeza mu majyaruguru (yo merekezo y’umuyaga ufite ubuhehere), bakamenya ko nta cyumweru gisigaye ngo imvura itangire kugwa.

Udusimba tuba mu gitaka nk’intozi, inzukira, umuswa n’ibindi, iyo twabaga dusohoka mu gitaka, cyangwa tuva mu mibande tujya imusozi, nabwo bamenyaga ko turimo guhunga ubushyuhe buri mu kuzimu, bubanziriza imivu y’imvura icengera mu gitaka cyangwa igatemba igana mu kabande no mu gishanga.

Umuntu aramutse apimye iminsi urutozi rushobora kumara rutabona amazi, yahita amenya umunsi imvura izagwiraho.

Imvura kandi yabaga yegereje kugwa, iyo abasaza n’abandi banyantege nke bacikaga intege, bakarwara asima, cyangwa se abantu muri rusange bakagira icyokere cyinshi kugeza n’ubwo barara batiyoroshe.

Imvura yabaga iri mu nzira zo gucika, impeshyi cyangwa urugaryi bigiye gutangira, bakumva imbeho nyinshi mu gitondo.

Iyo ubushyuhe bwakomezaga, cyangwa intozi zigatinda gusubira mu kabande no mu gitaka, bamenyaga ko imvura itaracika. Ubwo gutabira ibijumba byarakomezaga.

Guteganyiriza ibihe biragoye; nk’uko bisobanurwa na Mukangoga Immaculee w’imyaka 67

Nta biza nk’iby’iki gihe byabagaho kuko abaturage bari bakiri bake, bakamenya gutura heza mu mpinga z’imisozi.

None ab’ubu barahinga bakanatura mu bikombe, imisozi ikabaridukira cyangwa ikabaridukana. Baratura kandi bagahinga mu bishanga, kandi ari iwabo w’imyuzure.

Imwe mu mpamvu zatumaga abaturage batiyongera cyane ngo batangire kubura aho guhinga no gutura, ngo kuboneza urubyaro byarikoraga bitewe n’umuco wo gukunda umurimo.

Abantu bo hambere birindaga kuryamira kugeza saa kumi n’imwe za mu gitondo, kuko ari cyo gihe kizwi ko igitsina cy’umugabo kiba cyahagurutse, agakeneye gutera akabariro.

Nta mukobwa watahaga ijoro nk’abubu bikinga ijoro bagasambana; ndetse aho kubonanira kw’abakobwa n’abahungu habaga ari hake cyane, ku buryo baburaga umwanya wo guteretana no kuba inkorabusa.

Hambere kandi umuryango wakurikizaga umwana uri mu kigero cy’imyaka ine byibuze, kuko umugabo yabaga yaragiye guhakwa i Bwami, umugore nawe yabaga akitswe n’imirimo myinshi, ndetse agendera ku mahame y’umuco wamutozaga kudaca inyuma uwo bashakanye.

Mukangoga utuye mu karere ka Nyarugenge.

Kera bahunikaga mu mitiba no mu bigega kugeza ibindi biribwa byeze, kandi baryaga bike bakirinda umurengwe no kwirara; ariko ab’ububu ngo inzara itangira kubica hadashize kabiri bejeje.

Mu bibazo biterwa n’imihindagurikire y’ibihe, ibiza ku isonga mu kwica abaturage no guhungabanya ubukungu bw’igihugu, biraturuka ku mvura nyinshi igwira rimwe ikangiza byinshi, igakurikirwa n’amapfa abuza abantu guhinga bakicwa n’inzara.

Muri iki gihe abasaza bagaragaza impungenge z’uko imvura itaracika neza, bitewe n’uko impeshyi itarimo imbeho nyinshi mu gitondo.

Fabrice Mugabo ukora mu mushinga w’ubumenyi ku mihindagurikire y’ibihe muri REMA, avuga ko iki kigo kizaha agaciro ibitekerezo by’abasheshe akanguhe kirimo kwegeranya hirya no hino mu gihugu, kikazabibika ndetse kikanakoresha byinshi muri byo, kuko bifite aho bihuriye n’ukuri kugenwa na siyansi.

Simon Kamuzinzi