Kubera iyo mpamvu hamwe n’imvune guca inkwi zisaba ndetse n’indwara bishobora gutera abakora mu bikoni, ibigo by’amashuri birasabwa kugabanya gucana inkwi hashakishwa ubundi buryo bwakoreshwa nka biogaz, amashanyarazi n’ibindi.

Nyuma y’uko ibi bisabwe n’abagize komisiyo ishinzwe uburezi mu nteko ishinga amategeko umutwe w’abadepite muri Gashyantare uyu mwaka ubwo basuraga amashuri y’icyitegererezo yo mu karere ka Ngororero, ubuyobozi bw’akarere nabwo burasaba abayobozi b’ibigo by’amashuri kwihutisha iyi gahunda.

Umuyobozi wungirije ushinzwe imibereho myiza y’abaturage ufite n’uburezi mu nshingano ze mu karere ka Ngororero, Madamu Nyiraneza Clotilde avuga ko ibigo by’amashuri bikwiye kureba kure bigateganya ubundi buryo bwo gucana butari inkwi kuko ibiti bigenda biba bikeya ari nako birushaho guhenda.

Byongeye kandi, uburyo hamwe na hamwe mu bigo by’amashuri bakoresha mu gucana ntibukingira abakozi bo mu gikoni, bakaba bashobora kuhakura indwara ziterwa n’imyotsi ituruka ku biti.

Mu gihe gukoresha Biogaz ari icya mbere gitekerezwa mu gukemura iki kibazo, mu karere ka Ngororero nta kigo cy’ishuri kiratangira gukoresha ubu buryo mu rwego rwo kubera ibindi bigo urugero nkuko umukozi ushinzwe ibidukije muri aka karere abivuga, icyakora ngo ikigo cya CIC Muramba kiri mu myiteguro yo gukoresha biogaz.

Ernest Kalinganire