Umuyobozi mukuru wa Pariki y’igihugu ya Nyungwe, Rugerinyange Louis, atangaza ko ubu bwiherero buzashyirwa ahitwa ku Kitabi mu murenge wa Kitabi mu karere ka Nyamagabe, bityo imidoka zose zikazajya zihagarara abagenzi babikeneye bakabanza bakiherera mbere yo kwinjira muri pariki.

Ubu bwiherero ngo buzahabwa abagore bakora ubukorikori maze bage babukorera isuku ndetse bunabinjirize amafaranga.

Ikigo cy’igihugu gishinzwe iterambere (RDB) kandi ngo cyamaze gutanga isoko ryo kuzana udusanduku tuzajya dushyirwamo imyanda tuzashyirwa ku muhanda uca muri pariki y’igihugu ya Nyungwe, bityo abagenzi bakeneye kujugunya imyanda bakajya babona aho bayishyira.

Umuyobozi mukuru wa Pariki y’igihugu ya Nyungwe yagize ati: “Ku rwego rwa RDB ndetse n’abafatanyabikorwa tugiye gushyiraho ibyo gutamo imyanda bigezweho kuri uyu muhanda wose. Ibisanduku bigezweho byatangiwe isoko ubwo muri uku kwezi gushira tuzaba twabishyize ku muhanda”.

Ubwo hakorwaga umuganda udasanzwe wo gusukura pariki ya Nyungwe hatoragurwa imyanda abagenzi baba bataye ku muhanda tariki 12/01/2013, umunyamabanga nshingwabikorwa w’intara y’iburengerazuba, Jabo Jean Paul yashimye gahunda yo gushyiraho ubwiherero rusange.

Yanasabye ko ubwiherero butashyirwa ku Kitabi gusa, ahubwo ko hagati muri pariki ndetse n’aho umuntu ayisohokeramo mu karere ka Nyamasheke hashyirwa ubundi bityo abashoferi bahageze bakajya bareka abagenzi bakiherera.

Hifujwe ko no mu mamodoka atwara abagenzi hajya hashyirwamo utuntu bajya bashyiramo imyanda bityo baza kugera ahantu hari udusanduku twagenewe imyanda bakayisukamo.

Umunyamabanga nshingwabikorwa w’intara y’iburengerazuba yatangaje ko bagiye gusaba inama njyanama z’uturere dukora kuri Nyungwe tugashyiraho amabwiriza yo kuyigirira isuku n’ibihano bizajya bifatirwa abayarenzeho.

Emmanuel Nshimiyimana