Isambaza zatewe mu Kivu ziturutse mu kiyaga cya Victoria naho LAMPRICHYTYS TANGANICANUS zo nk’uko ibyumvikana mu izina ryazo (TANGANICANUS) zaturutse mu kiyaga cya Tanganyika; nk’uko bisobanurwa n’umuhuzabikorwa w’umushinga w’uburobyi mu Karere ka Karongi, Projet Pêche Kibuye (PPK), Sibomana Jean Bosco.

Ubwoko bwa LAMPRICHYTYS TANGANICANUS nubwo buribwa n’abantu, abarobyi ntago babukunda kubera ko burangwa no kurya andi mafi cyane cyane Isambaza.

Abarobyi bagerageje kuzishakira izina ry’ikinyarwanda bazita Rwanda Rushya ariko nyuma baje gusanga nta mpamvu yo kuzita izina ryiza kandi zirya izindi, niko kuzihimba PURURU kubera ko zinyaruka cyane kurusha izindi.

Umuhuzabikorwa wa PPK asobanura ko n’ubwo izo fi zirya Isambaza, nta mpungenge nyinshi ziteye kuko zitororoka cyane nk’isambaza. Isambaza igeze mu gihe cyo gutera amagi ishobora gutera ari hagati ya 35.000 na 40.000, mu gihe LAMPRICHYTYS TANGANICANUS zigeze mu gihe cyo gutera zitera atarenga 5000.

Indi nenge y’ayo mafi ni uko arushya guteka kuko bisaba kubanza kuyavanamo ibyo munda byose bigashiramo. Iyo hari na duke dusigayemo ifi yose usanga irura.

Ikigaragara nuko nta bundi buryo abashinzwe uburobyi bafite bwo kuzirwanya kuko zimaze igihe kinini zibera mu Kivu (kuva mu 1959). Sibomana avuga ko bitoroshye kuzirwanya kuko zibana n’andi mafi.

Icyo bihatira ni ugushishikariza abarobyi kubahiriza amategeko agenga uburobyi bakanakoresha ibikoresho byabugenewe bitangiza amagi y’izindi samake (Isambaza cyane cyane) bityo akabasha kororoka.

Marcellin Gasana