Ibyo biganiro byatangiye tariki 05/03/2014 byahuje abantu bo mu byiciro binyuranye bifite aho bihurira n’imicungire kimwe n’imikoreshereze y’umutungo kamere mu turere dutandatu two mu ntara y’iburengerazuba n’iy’amajyaruguru.

“Foret Modèle” hano ntabwo bisobanuye ishyamba ry’icyitegererezo, ahubwo ni uburyo bwatangijwe n’Abanyakanada bugamije guhuza abantu b’ingeri zinyuranye bafite aho bahurira n’imicungire cyangwa imikoreshereze y’umutungo kamere, maze bakaganira ku buryo bunoze uwo mutungo kamere bahuriyeho wakoreshwa, kandi ntibibangamire iterambere rirambye.

Dr. Chimère Diaw, umuyobozi wa RAFM (Reseau Africain des forets modeles) yagize ati “ntabwo icyo tureba ari iri shyamba risanzwe, ni uburyo bwo kwicarana, abantu bakareba uko batabangamirana muri ubu buzima.”

Ubu buryo bwarasakaye kuri ubu bukaba bwarageze kandi bukoreshwa mu bihugu bigera kuri 30.

Madame Mukaminani Angele, umuyobozi w’agateganyo wa Foret modele y’u Rwanda, asanga ubushake bwiza bwa politiki kimwe n’imyumvire myiza kuri ubu usangana Abanyarwanda, abishingiraho akemeza ko ubu buryo buzihuta mu gutanga umusaruro.

Ati “amahirwe arahari, icya mbere ni imiyoborere myiza na gahunda nziza u Rwanda rwihaye yo gucunga neza umutungo kamere.”

Ku ikubitiro, Foret Modèle ku rwego rw’igihugu yatangijwe mu turere dutandatu, ari two Rubavu, Rutsiro, Nyabihu na Ngororero duhurira ku ishyamba rya Gishwati mu ntara y’Iburengerazuba, hamwe na Burera na Musanze bihurira kuri pariki y’ibirunga mu ntara y’Amajyaruguru, iyi ikaba ari yo mpamvu Foret Modèle y’u Rwanda yiswe Foret Modèle des Hautes Terres du Rwanda.

Malachie Hakizimana