Iyi myuka yakumiriwe ku rwego rw’isi izwi cyane kugira uruhare mu kugabanya umumaro w’agayungirizo k’izuba, nk’uko Rose Mukankomeje, umuyobozi w’Ikigo cy’Igihugu kita ku bidukikije (REMA), yabitangaje kuri uyu wa Gatatu tariki 11/6/2014.

Yagize ati “Mu by’ukuri ikibazo ntago ari iyo myuka ahubwo ikibazo ni icyo iyo myuka ikora ku kayungirizo k’izuba. Akayunguruzo k’izuba kameze nk’akayunguruzo gasanzwe. Noneho iyo myuka iragenda ikakangiza ku buryo ya mirasire ikomeye ihita igera ku bantu vuba. Niyo mpamvu hari abantu ubona bafite nk’ibibara ku mubiri hari n’ukuntu yica mu maso.”

Ibyo kandi byiyongeraho indi ngaruka ikomeye y’uko iyi myuka igira uruhare mu mihindagurikire y’ikirere. Aho usanga imvura yarabuze cyangwa yagwa ikagwa ari nyinshi ikangiza ibintu, nk’uko Mukankomeje yakomeje abisobanura.

Abitabiriye inama igamije kongerera ubumenyi abakozi bashinzwe ibyo kurengera akayungirizo k’izuba mu bihugu 28 bya Afurika.

Ibi yabitangarije mu nama mpuzamahanga y’iminsi ibiri iri kubera i Kigali, ihuje abakozi bashinzwe kurengera akayungrizo k’izuba mu bihugu 28 bya Afurika bivuga Icyongeleza n’Igipolitugali.

Iyi nama iteraniye bwa mbere ku mugabane wa Afurika ikakirwa n’u Rwanda igamije kubongerera ubumenyi ku bijyanye no gusimbuza ibikoresho bikoresha iyi myuka hagashyirwaho ibindi bishya byemejwe ko nta kibazo byateza.

Kuva u Rwanda rwatangira gushyira mu bikorwa iyi gahunda, aho rwakoze amahugurwa atandukanye ku bacuruzi n’ababisana, rwashoboye kuzamuka rugera kuri 30%. Iki kigero nicyo kifuzwaga n’amahame mpuzamahanga yashyizweho, byatumye u Rwanda ruhabwa igihembo.

Emmanuel N. Hitimana