Ibi abanyamakuru na bamwe mu bashinzwe itumanaho muri za minisiteri z’ibihugu byombi babisabwe n’umushinga Global Water Partnership mu biganiro by’iminsi ibiri bigamije kureba uko ikiyaga cya Cyohoha y’Epfo cyarushaho kubungabungwa kikanagirira akamaro abagituriye.

Umuhuzabikorwa w’umushinga Global Water Partnership, Safari Patrick, avuga ko uyu mushinga washinzwe hagamijwe kubungabunga ikiyaga cya Cyohoha y’Epfo gihuriweho n’u Rwanda n’u Burundi.

Yagize ati “iyo gahunda yatangijwe mu rwego rwo gufasha abatuye akarere ka Bugesera mu Rwanda n’abatuye Intara ya Kirundo mu Burundi guhangana n’imihindagurikire y’ibihe, hibandwa kuri icyo kiyaga, dore ko gifitiye abaturage b’impande zombi akamaro gakomeye haba ku mafi, ku mazi n’ibindi”.

Safari avuga ko inzego zitandukanye zakanguriwe ibyiza by’uwo mushinga ndetse bamwe mu baturage batangiye kubona impinduka nziza z’ibikorwa byawo, ariko noneho uruhare rw’abanyamkuru nk’abavuga rikumvikanira kure rwari rukenewe.

Ku ruhande rw’u Rwanda hari ibikorwa byo kubungabunga ikiyaga cya Cyohoha y’Epfo byitaweho kandi byatanze umusaruro ufatika nk’uko bivugwa n’umunyamabanga shingwabikorwa w’umurenge wa Kamabuye, Muyengeza Jean de Dieu uherereyemo icyo kiyaga.

Ati “twakanguriye abaturage guhinga basize metero 50 uvuye ku kiyaga maze barabyubahiriza none umusaruro barawubonye kuko amazi yariyongereye kandi banatera ibiti ku nkengero z’ikiyaga none imvura ikaba igwa neza nta kibazo”.

Ku ruhande rw’u Burundi ariko siko bimeze kuko abaturage bahinga imyaka yabo ku nkengero z’ikiyaga ntibite kukibungabunga.

Aha ngo niho abanyamakuru bagomba kugaragariza imbaraga bakangurira abaturiye icyo kiyaga gukora ibyo bagenzi babo bo mu Rwanda bakoze nk’uko Remy Ndayishimiye ushinzwe itumanaho muri Minisiteri y’amazi mu Burundi abivuga.

Ati “twamaze gusobanukirwa uruhare rwacu, tugiye kugira icyo dukora mu nshingano zacu maze twereke abaturage ibibi n’ibyiza byo kubungabunga kino kiyaga. Kandi ndizera ko intego tuvanye aho tuzayigeraho nta kabuza”.

Umushinga Global Water Partnership wateguriye imishinga igamije guteza imbere abaturiye icyo kiyaga bikurikije ibyifuzo byabo mu bihugu byombi.

Egide Kayiranga