Umujyi wa Nyanza ku rutonde rw’imijyi itoshye ku isi
Umuryango mpuzamahanga uhuza imijyi ifite icyerekezo cyo kubungabunga ibidukikije (ENO Progamme) washyize umujyi wa Nyanza uherereye mu Ntara y’Amajayepfo y’u Rwanda ku rutonde rw’imijyi itoshye ku isi (Green Cities)muri uyu mwaka wa 2014.
Uru rutonde rwari rusanzweho imijyi 42 rwiyongereyeho imijyi 11 yo mu bihugu bya Mexique, Fiji, Ghana, Kosovo n’umujyi wa Nyanza mu Rwanda yose hamwe iba imijyi 53 yo ku isi muri uyu mwaka wa 2014.
Nk’uko urubuga rwa greencities.enoprogramme.org rwabitangaje umujyi wa Kenyasi mu gihugu cya Ghana n’umujyi wa Nyanza mu Rwanda muri Afurika niho hatoranyijwe hashyirwa ku rutonde rw’imijyi itoshye ku isi muri uyu mwaka wa 2014.
Umujyi wa Nyanza mu Rwanda wiyongereye ku rutonde rw’ibihugu byo muri Afurika birimo umujyi wa Iringa muri Tanzaniya, umujyi wa Cape Town muri Afurika y’Epfo n’umujyi wa Khartoum muri Sudani.
Umuyobozi w’akarere ka Nyanza agira ati: “Twabonye amakuru aduhamiriza icyo kintu mu kwezi kwa cumi muri uyu mwaka wa 2014 niyo mpamvu twarushijeho kongera umubare w’ubuso buteweho ibiti ngo umujyi wa Nyanza urusheho kuba umujyi utoshye (Green City)”.
Bwana Murenzi Abdallah yabwiye Kigali Today ko kugira ngo bashyirwe kuri uru rutonde rw’imijyi itoshye ku rwego rw’isi ari ubushake bagize mu kurushaho kongerera ubwiza uyu mujyi hagamijwe iterambere rirambye rishingiye ku kubungabunga ibidukikije.
Agira ati: “Uru rutonde rwakozwe n’umuryango ENO Programme nyuma yo kubiwusaba ndetse nabo ubwawo baza kwirebera ibishingirwaho mu kugira ngo bemeze ko umujyi utoshye ku isi basanga umujyi wa Nyanza ubyujuje”.
Kimwe mu bishingirwaho ngo umujyi ushyirwe kuri urwo rutonde ni icyerekezo umujyi ufite mu negengo y’imari mu bijyanye no kwita mu bidukikije. Umujyi wa Nyanza ngo buri mwaka ugena amafaranga ari hagati ya miliyoni 20 na 25 muri icyo gikorwa.
Umujyi ushyizwe ku rutonde rw’imijyi itoshye ku isi umuryango mpuzamahanga wa ENO Programme uwugenera n’igihembo ariko ngo ubuyobozi bw’akarere ka Nyanza ntburamenya uko igihembo bazahabwa kingana; nk’uko bisobanurwa n’umukozi ushinzwe ibidukikije mu karere ka Nyanza.
Nsengimana Aimable ushinzwe ibidukikije mu Karere ka Nyanza yavuze ko nk’umujyi ufite icyerekezo cy’iterambere bafite gahunda yo gukomeza kongerera ubwiza umujyi wa Nyanza batera ibiti bitanga umwuka mwiza ndetse binogeye ijisho ku buryo bukurura bamukerarugendo baza baje gusura n’ingoro ndangamateka zo muri aka karere.
Umuganda wo kuri uyu wa 29/11/2014 watewemo ibiti bisaga ibihumbi 18, wanitabiriwe na Minisitiri Oda Gasinzigwa ushinzwe iterambere ry’umuryango ndetse akaba n’ushinzwe akarere ka Nyanza muri Guverinema muri uwo muganda wasobanuriye abaturage akamaro ko gutera ibiti.
Mu myaka itatu iri imbere akarere ka Nyanza gafite intego yo gutera ibiti bisaga miliyoni no gutunganya ubusitani rusange mu bice bitandukanye muri gahunda yo gutuma umujyi wa Nyanza uhora ku isonga ry’imijyi itoshye muri aka karere u Rwanda ruherereyo ndetse no ku isi muri rusange.
Jean Pierre Twizeyeyezu
Ibitekerezo ( 9 )
Ohereza igitekerezo
|
Nyanza uyu mwanya iwubonye iwukwiye. kuko birigaragaza.
mujye mushima ibishimwa ahubwo mushyire imbaraga mu gutera imbere ubundi kugaya ibyagashimwe ni amatiku
Kanda kuri iyi link ubisome
http://greencities.enoprogramme.org/eno-green-cities-news
http://greencities.enoprogramme.org/eno-green-cities-news
Ngiyo link byavuyeho mujye mureka amatiku abanyarwanda amashyari niyo atuma mudatera imbere bikiyongeraho n’ubumemenyi buke bwo kudasoma.
Murabeshya kweliiii
uyu munyamakuru wanyu arakabya, arabeshya, arya akantu ntabwo ibyo yavuze aribyo rwose namwe ntimukiteshe agaciro mutarabigenzura
byiza cyane kujya kuri uru rutonde rw’imijyi myiza itoshye kandi ibi biranaduha ingufu zo gukomeza kubungabunga uyu mujyi nindi muri rusange ngi dukomeze dutere imbere muri byinshi
Ese ko tuzi ko umuhanda ugiye kwagurwa, hari gahunda ki kubiti bizasimbura ibiri kumihanda? witegereje usanga ibiti biri kunyengero z’umuhanda ari byinshi kandi hafi yabyose biri aho umuhanda uzanyura. mutumenyere uko byizweho.
waooo! ariko Nyanza n’ubundi ubona ku misozi yaho hatoshye cyane