Hari inyubako zimwe na zimwe cyane cyane izubatswe mbere y’1994 zitahawe uburyo bwo gufata amazi, izo nizo zigomba kwitabwaho mu gutanga urugero ku baturage koko gufata amazi birinda ingaruka mbi nyinshi.

Umuyobozi w’akarere, Gedeon Ruboneza, avuga ko gufata amazi cyane cyane mucyaro no gucukura imirwanyasuri byagabanyije ku buryo bugaragara itwarwa ry’ubutaka n’isenyuka ry’amazu cyane muri iki gihe cy’imvura nyinshi.

Kubera iyo mpamvu ubuyobozi bw’akarere bwihaye intego ko buri nzu igomba kugira uburyo bwo gufata amazi, bityo guhera kunyubako za leta bikaba bizaba intangarugero kubaturage.

Nubwo hari bamwe mubaturage bavuga ko gufata amazi bihenze, Roger Kabagema, ushinzwe imiturire n’ubutaka mu karere ka Ngororero avuga ko kubadafite amikoro yo gukora ibigega bibika ayo mazi akazongera gukoreshwa baba bifashishije ibyobo bifata amazi cyangwa bikayagabanyiriza imbaraga n’ubwinshi igihe atemba.

Gusa, ikibazo cy’imitere y’akarere ka Ngororero kagizwe n’imisozi ihanamye nayo ngo ntiyorohereza abatuye mubice by’icyaro gufata amazi yose anyura hafi y’amazu yabo, nk’uko Anitha Umumararungu utuye mu murenge wa Muhororo abitangaza.

Avuga ko yagerageje gufata amazi y’aho atuye ariko aturka mumusozi atuyeho akamunanira.

Gusa ubuyobozi bw’akarere burasaba abaturage gukora ibishoboka byose bakarwana kubuzima bwabo ndetse no kumitungo yabo, ahagaragaye kunanirwa hakitabazwa izindi mbaraga zirimo umuganda w’abaturage.

Ernest Kalinganire