Iki kibazo zikimaranye iminsi kuko zajyaga ziva mu nkambi zikajya gushaka inkwi hanze bityo ugasanga bishobora guteza ikibazo cyo kwangiza ibidukikije.

Kuri uyu wa 19/09/2013 muri iki gitondo nibwo izi mpounzi zafashe icyemezo ryigabiza ishyamba rya Leta riri mu murenge wa Kajyeyo akagari ka Gihembe mu mudugudu wa Munini.

Zimwe muri izo mpunzi zarimo zitema ibiti muri iri shyamba zitashatse ko zitangazwa amazina yazo zavuze ko gukora ibyo zashatse kwerekana akababaro kazo kandi ko ziramutse zidakemuriwe ikibazo cy’inkwi zo guteka zakwicwa n’inzara.

Ushinzwe amashyamba mu karere ka Gicumbi, Sayinzoga Boniface, atangaza ko iki kibazo kizwi kandi ko kimaze iminsi kandi ubwo Minisiti ushinzwe gucyura impunzi no guhangana n’ibiza, Mukantabana Seraphine, yabasuraga yababwiye ko kigiye kubonerwa umuti mu gihe cya vuba.

Gusa ntabwo kigeze gikemuka kuko rwiyemezamirimo wari watsindiye isoko ryo kugemura inkwi muri iyi nkambi byamunaniye bityo biteza icyo kibazo cy’izo nkwi.

Ikindi kibazo ubuyobozi bw’akarere bufite n’uko izi mpunzi niziramuka zisaruye iri shyamba rya Leta rigashiraho bazadukira n’amashyamba y’abaturage bikaba byateza umwuka mubi hagati yazo nabo baturage bagasanga hari hakwiye gufatwa ingamba kubo bireba bose.

Sayinzoga Boniface avuga ko bari gushaka igisubizo cya vuba kandi cyihuse kuko ubu rwiyemezamirimo wari usanzwe ajyemura inkwi mu nkambi ya Nyabiheke muri Nyagatera ariwe bahaye iryo soko ubu akaba ariwe watangiye icyo gikorwa cyo gushakira inkwi izo mpunzi.

Mucyo Patrick wahawe iryo soko yasabye ko bamufasha bakamurangira aho yagura amashyamba ikindi ubu yatangiye gufasha izo mpunzi gutema neza bimwe mu biti zari zatangiye gutemera hejuru ndetse ubu arimo kugenda azitunganya.

Gusa aracyasanga bimugoye kuzabona inkwi zihagije kuko akarere ka Gicumbi gafite ikibazo cy’amashyamba make kuko amenshi asarurwa ajya gucanwa muri gereza ya Miyove amashuri ndetse n’inkambi.

Ernestine Musanabera