Iyi gerenade aba bana bakinishaga ngo niyo mu bwoko bwa Tortois ikaba yari ishaje idafite umutwe nk’uko Mbarubukeye Vedaste umunyamabanga Nshingwabikorwa w’umurenge wa Busoro abitangaza.

Aba bana barimo bakinisha iyo gerenade babonwe n’umugabo witwa Ntanganda Jean Damascene wahoze ari umusirikare mu ngabo z’igihugu ngo wahise yihutira kubimenyesha ingabo z’igihugu zikorera mu murenge wa Busoro kugira ngo zize kukihavana; nk’uko byemezwa n’umuyobozi w’umurenge wa Busoro.

Mbarubukeye Vedaste uyobora umurenge wa Busoro iyi gerenade yatowemo aravuga ko amahirwe bagize ari uko uyu Ntaganda Jean Damascene yahise ahahinguka. Ati: “Iyo bitaba ibyo bariya bana bari buturikanwe nacyo maze kikabambura ubuzima”.

Yakomeje atanga ubutumwa ku bantu bakuru ndetse n’abana by’umwihariko kwirinda gukinisha ibintu by’ibyuma babonye batazi.

Yagize ati: “Ibintu by’ibyuma ni ibyo kwitondera kuko nyuma ya Jenoside yakorewe Abatutsi mu Rwanda hari ibisasu bigiye biri hirya no hino mu bisambu byari byarahawe Interahamwe rero bishobora kugira uwo byahitana mu gihe byakinishijwe n’abantu batabizi ko ari bya kabutindi by’ibisasu”.

Nyuma y’uko iyi gerenade yambuwe aba bana yahise ishyirwa mu maboko y’ingabo z’igihugu zikorera mu murenge wa Busoro nk’uko ubuyobozi bw’uyu murenge bwakomeje bubitangaza mu gihe bigiteregejwe ko gituritswa ku mugaragaro hagatangwa n’ubutumwa bwo kwirinda ibisasu n’intwaro mu baturage.

Jean Pierre Twizeyeyezu