Abakubiswe n’inkuba ni Uwirebera Marie Louise w’imyaka 21 y’amavuko na Mukakamari Marie Rose w’imyaka 39 y’amavuko bose bakaba bari bacumbitse mu nzu imwe uretse ko imiryango itandukanye.

Iyi nkuba yabakubise bari mu mazu yabo bugamye imvura nyinshi yagwaga. Uwirebera asize umwana umwe w’imyaka 3 naho Mukakamari we asize abana babiri.

Inzu y’imbere igaragaza aho inkuba yakubise.

Ku itariki 20 Kanama uyu mwaka mu mudugudu w’Isangano akagali ka Mimuli nabwo inkuba yakubise abandi bantu babiri bo mu muryango wa Mbugurize Jean damascene, umugore we Mukakabando Tatienne w’imyaka 35 y’amavuko n’umwana we w’imyaka 3 bahita bitaba Imana.

Aba bo ngo bari bagiye kureka amazi kuko imvura yagwaga. Umugabo Mbugurize nawe yahiye mu mugongo ariko ariho.

Ubuyobozi bw’umurenge wa Mimuli bukangurira abaturage kwirinda ibintu byose bikoresha amashanyarazi byatuma inkuba ibakubita birimo telephone na radio; nk’uko bisonaurwa na Ruboneka Syliva uyobora uwo murenge.

Ubu ngo barimo kuvugana na minisiteri y’ibiza kugira ngo ibashakire impuguke zizaze kwigisha abaturage uko bakwirinda inkuba.

Sebasaza Gasana Emmanuel