Amakuru yatangajwe n’ikigo cy’igihugu gishinzwe ubuzima RBC avuga ko abarenga 33% bashyizwe ku miti muri 2022/2023 ari abamenyekanishijwe n’abajyanama b’ubuzima.

Aba bajyanama b’ubuzima bavuga ko amagare bahawe azabafasha mu kazi kabo ka buri munsi ndetse akazaborohereza ingendo bakoraga bajya muri ibyo bikorwa byo gufasha abarwayi batandukanye.

Raporo mpuzamahanga ku ndwara y’igituntu ya 2023 igaragaza ko u Rwanda rwateye intambwe igaragara mu kurwanya igituntu; umubare w’abarwayi wavuye ku barwayi 96 ku baturage 100,000 mu mwaka wa 2000 ugera ku barwayi 56 ku baturage 100,000 mu mwaka wa 2023.

Dr Brian Chirombo avuga ko buri munota abantu batanu bapfa bishwe n’igituntu, ikaba ari yo mpamvu iyi ndwara abantu bagomba kuyifata nk’indwara mbi ariko ishobora kwirindwa ndetse ikanakumirwa harwanywa izo mpfu ziyiturukaho.

Dr Tuyishime Albert avuga ko u Rwanda ruzaba rwaranduye igituntu mbere y’umwaka wa 2035.

Ati: “Dufite icyizere ko u Rwanda ruzagera ku ntego y’iterambere rirambye ijyanye no kurandura igituntu mbere y’umwaka wa 2035. Ibyo nk’Igihugu tuzabigeraho binyuze mu bufatanye bw’inzego za Leta, sosiyete sivile n’abandi bafatanyabikorwa bose.

Uyu munsi mpuzamahanga wo kurandura igituntu wari ufite insanganyamatsiko igira iti “Dufatanye Turandure Igituntu”.