Ibi Minisitiri Busingye yabivuze kuwa kane tariki 14/8/2014, ubwo yasuraga umurenge wa Byimana nyuma y’aho ugwiriwe n’ayo mahano yo kubura umuryango wose.

Umuryango w’abana batanu na nyina wa gatandatu wishe n’abantu bataramenyekana.

Mbere yo kugirana ibiganiro n’abaturage b’uyu murenge, Minisitiri Busingye yabanje kwifuriza iruhuko ridashira uyu muryango, asaba abaturage kwirinda amakimbirane n’inzangano kuko ahanini ariho ububwicanyi bw’indekamere buturuka.

Yagize ati “Ndabizeza ko hazakorwa ibishoboka byose, abakoze aya mahano bakaboneka ndetse bakanabiryozwa mwese mureba. Mugerageze kwihanganira ibyabereye hano, ntibyababaje Abanyaruhango gusa, ahubwo byababaje igihugu cyose.”

Minisitiri Businge aremeza ko abantu bishe abavandimwe batandatu bazaryozwa ibyo bakoze.

Ubuyobozi bw’akarere ka Ruhango buvuga ko ibintu nk’ibi bitari bisanzwe muri aka karere, gusa bukavuga ko bugomba gushyiraho ingamaba zikomeye zo gushishikariza abaturage kubana mu mahoro.

Kugeza ubu urwego rwa polisi rutangaza ko urupfu rwaba bantu rukimara kumenyekana, abantu bagera kuri batanu aribo bahise batabwa muri yombi mu rwego rw’iperereza.

Eric Muvara