Dr. Harebamungu asobanura ko hari abanyeshuri batazi gusoma no kwandika bitewe n’abarimu bakora nabi n’abayobozi b’ibigo, badakurikirana imyigishirije y’abarimu. Atanga urugero rw’abayobozi b’ibigo bamara umwaka batarareba ibyo abarimu bigisha.

Ireme ry’uburezi mu mashuri abanza nta ho rihuriye no kwiga igitondo n’ikigoroba (double shift), kuko uburyo bukoreshwa no mu bihugu byateye imbere mu burezi kurusha u Rwanda; nk’uko Umunyamabanga wa Leta yakomeje abitangaza.

Abakozi bashinzwe uburezi mu mirenge n’abayobozi b’ibigo. (Photo: N. Leonard)

Yavuze ko icya ngombwa ari uko umwarimu yigisha amasaha agomba gukora kandi agakora akazi ke neza.

Ahakana ko nta kibazo cya laboratwari kiri mu mashuri, kuko Minisiteri y’Uburezi yatanze ibikoresho by’ibanze (Sciences kit). Akemeza ko abavuga ko bafite icyo kibazo ahubwo nta bumenyi bafite mu gukoresha ibyo bikoresho.

Umunyamabanga wa Leta yaboneyeho gusaba abayobozi b’ibigo n’abakozi bashinzwe uburezi mu mirenge bo mu Karere ka Gakenke tariki 27/12/2012, gukoresha ibyo bikoresho by’amasiyansi kuko abanyeshuri barushaho kumenya ibyo biga.

Ku kibazo cyo gusibira kw’abanyeshuri, Dr. Harebamungu avuga ko 25% by’abanyeshuri biga amashuri abanza basibira buri mwaka, uwo mubare ukaba ari munini. Ngo amafaranga afasha ibigo by’amashuri azwi nka Capitation grant azajya atangwa hakurikije abanyeshuri bimuka.

Leonard Nshimiyimana