Umukozi w’akarere ushinzwe igenamigambi Birorimana Jean Paul, agaragaza ko mu myaka ine ishize, aka karere kakoresheje ingengo y’imari ingana na miliyari 52 zose hamwe. Kuri aya mafaranga, abaturage batanze uruhare rungana na miliyari 16, zingana na 30,7% by’imari yose yakoreshejwe.

Uyu mukozi akomeza avuga ko uko imyaka igenda ikurikirana ari nako uruhare rw’abaturage rugenda rwiyongera.

Ibi biterwa ahanini n’imirimo mishya ivuka cyane cyane iyinjiza imisoro mu karere n’ibikorwa remezo nk’imihanda, amasoko, amashanyarazi n’ibindi no gukurura abashoramari muri aka karere.

Umuyobozi wungirije ushinzwe ubukungu muri aka karere Mazimpaka Emmenuel avuga ko iceyerekezo bafite ari “kwigira”, kandi ngo birashoboka kuko aka karere gakataje mu kugabanya ubukene no gushakira imirimo abaturage.

Abayobozi b’imirenge igize aka karere nabo bakaba bashimirwa ko bavuguruye uburyo bwo kwakira amahoro y’abaturage agenewe akarere, ubu imirenge ikaba yinjiza amafaranga mu kigega cy’akarere kuburyo hari imirenge igeza kuri miliyoni 35 ku mwaka, ibitari bisanzwe muri aka karere.

Gusa hari bamwe mu batuye aka karere bakivuga ko bugarijwe n’ubukene ngo haracyari n’abasora binuba kubera ko bavuga ko basoreshwa amafaranga menshi adahuye n’ibikorwa byabo mu mirenge. Aba ahanini ni abasora bato nk’abacururiza mu masoko n’abafite ibicuruzwa bikeya.

Ernest Kalinganire