Umuvugizi w’umutwe wa M23, Lit. Col. Jean Marie Vianney Kazarama, yabwiye ibiro ntaramakuru by’Abafaransa ko muri ibyo bitero hamaze gupfiramo abaturage 10 b’abasivili n’abasirikari ba M23 batatangajwe umubare.

M23 ivuga ko ibyo bitero nibikomeza na yo ishobora gutangira kurwanya ingabo za Leta ya Congo. Leta ya Congo yahakanye amakuru avuga ko ingabo za yo zagabye ibitero ku mutwe wa M23 byapfiriyemo abaturage b’abasivili.

Umwe mu basirikari bakuru (officier) yavuze ko nta gitero na kimwe ingabo za Leta ya Congo zagabye kuri M23 muri iyi minsi ibiri. Ati “Ingabo zacu nta rugamba na rumwe zirimo. Tuzi neza ko ari M23 yishe abo bantu, barenga barindwi mu gace ka Kitagoma”.

M23 yahise itangaza ko idashobora kwihanganira na gato kubona abaturage b’abasivili bicwa, cyangwa ngo yihanganire igitero icyo ari cyose cyagabwa ku birindiro bya yo.

Ibi birego bigarutse mu gihe ibihugu bigize akarere k’ibiyaga bigari giteganya gushyiraho umutwe w’ingabo 4000 udafite aho ubogamiye uzafasha mu gukemura ibibazo biterwa no kutumvikana hagati y’ingabo za leta ya Congo n’iz’umutwe wa M23. Biteganyijwe ko izo ngabo zizajya muri Congo mu kwezi gutaha kwa 12.

Cyprien M. Ngendahimana