Umuvugizi wa Guverinoma ya Ethiopia, Bereket Simon, utatanze amakuru arambuye kuri urwo rupfu yatangarije ibiro ntaramakuru byu Bufaransa (AFP) ko Zenawi yarimo korohererwa ariko byaje guhinduka mu kanya gato bamwihutanye kwa muganga biba iby’ubusa avamo umwuka.

Ibitangazamakuru bitandukanye bitangaza ko Zenawi yari arwariye mu bitaro biri i Brusseli mu Bubiligi aho yari amaze ibyumweru bitatu.

Hari hashize ibyumweru umunani, Meles atagaraga ku karubanda kubera uburwayi bwakomeje kuba ibanga.

Televisiyo y’igihugu cya Ethiopia yatangaje ko Zenawi yazize indwara yandura (infection).

Mu mpera z’ukwezi kwa karindwi 2012 hacicikanye amakuru ku isi avuga urupfu rwa Meles Zenawi ariko yaje kugaragara ko ari ibihuha.

Ukurikije itegeko nshinga rya Ethiopia, Meles agomba gusimburwa na Minisitiri w’Intebe wungirije, Hailemariam Desalegn wari na Minisitiri w’ububanyi n’amahanga w’icyo gihugu.

Igihugu cya Ethiopia kigira Perezida ariko ni umwanya w’icyubahiro kuko imirimo ya buri munsi yo kuyobora igihugu ikorwa na Minisitiri w’Intebe.

Meles Zenawi ni umwe mu bayobozi b’ibihugu bashimiwe na Perezida w’u Rwanda, Paul Kagame, mu gihe cyo kwizihiza umunsi wo kwibohoza ku nshuro ya 15 kubera uruhare yagize mu rugamba rwo kubohoza u Rwanda no kurwanya ingengabitekerezo ya Jenoside .

Muri uwo muhango yambitswe umudari w’ikirenga bita “Uruti” hamwe na Perezida wa Uganda, Yoweri Kaguta Museveni ndetse na nyakwigendera Prof. Julius Nyerere wa Tanzaniya.

Zenawi w’imyaka 57 yafashe ubutegetsi ari umuyobozi w’inyeshyamba nyuma yo guhirika Mengstu Haile Mariam mu mwaka w’i 1991. Guhera ubwo yabaye Minisitiri w’intebe wa Ethiopia.

Nshimiyimana Leonard