Umuvugizi w’Ingabo z’Umuryango w’Abibumbye zishinzwe kugarura amahoro muri Kongo-Kinshasa (MONUSCO), Madnodje Mounoubai yatangarije ibiro ntaramakuru by’u Bufaransa (AFP), tariki 13/04/2013 ko uwo mutwe uzaba ugizwe n’abasirikare 3069 bitandukanye n’ibyatangazwaga mbere ko ari 2500.

Ibihugu by’Afurika y’Epfo, Tanzania na Malawi byarangije kwemera ubwo butumwa bwa UN. Buri gihugu kizatanga abasirikare 850.

Mounoubai agira ati: “Buri gihugu kizohereza abasirikare barwanira ku butaka 850 bityo bashyike 2550. Abandi basirikare 519 basigaye bazaba bagize umutwe w’abarashi b’ibitwaro binini, abagenzura aho umwanzi aherereye.”

Uyu mutwe ufite inshingano zikomeye zo guhashya imitwe ya gisirikare igera kuri 30 ariko ku isonga haza M23 na FDLR.

Uyo mutwe ubarizwa muri MONUSCO ariko ukazoyoborwa n’umujenerali ukomoka mu gihugu cya Tanzaniya, nk’uko abayobozi b’ibihugu ba ICGLR babisabye inshuro nyinshi ko uyoborwa n’Umunyafurika.

Minisitiri w’Ububanyi n’Amahanga muri Congo, Lambert Mende, atangaza ko uwo mutwe uzatangira imirimo yawo mu mpera z’uku kwezi kwa kane bikaba bihabanye n’ibyo itangazamakuru ryakundaga kuvuga ko uzatangira imirimo yawo muri Nyakanga 2013.

Mu ntangiriro z’uku kwezi kwa Kane itangazamakuru ryo muri Afurika y’Epfo ryatangaje ko ibikoresho bya gisirikare birimo intwaro bibarirwa mu matoni byapakiwe indege bijyanwa ku mupaka wa Uganda na Kongo-Kinshasa aho ingabo za Afurika y’Epfo (SANDF) zashyize ibirindiro.

Nshimiyimana Leonard