Nyuma y’iturika ry’iki gisasu, imbere y’iyo hoteli hagaragaye imirambo ibiri, umwe ushobora kuba ari uw’uwo mwiyahuzi witurikirijeho icyo gisasu mu gihe undi bivugwa ko yaba yari mu bashinzwe kurinda Perezida mushya Hassan Sheikh.

Perezida Hassan Sheikh na Minisitiri w’Ububanyi n’Amahanga wa Kenya, Sam Ongeri, bahise bakomeza inama yamaze igihe kinini aho ngo baba bahise bashyira umutekano kuri nomero ya mbere, iya kabiri ndetse n’iya gatatu y’ikigomba kwigwaho muri uwo mubonano; nk’uko bitangazwa na Reuters.

Iki gitero ni ikimenyetso cy’umutekano muke wugarije Somaliya, aho Perezida mushya ugiyeho bwa mbere mu matora nyuma y’imyaka 20 iki gihugu kiri mu kaduruvayo agomba kugerageza guhangana nacyo nk’uko abaturage babimutegerejeho.

Kugeza ubu ba nyirabayazana b’iki gitero ntibaramenyekana, ariko kuri uyu wa kabiri nyuma yuko uyu perezida mushya agiyeho, abashyigikiye umutwe w’intagondwa wa Al-Shabab batangaje ko bagiye guhangana na Leta ya Mohamud kuko ngo agiyeho ku bw’inyungu z’abanyamahanga.

Benjamin Nyandwi