Abapasitoro bo bavuga ko icyo cyemezo cyafashwe kubera ko abapasitoro banenga Leta ya Cameroun Paul Biya abereye perezida.

Perezida Biya ari kwifashisha igisirikari cya Cameroun mu rwego rwo gufunga burundu insengero z’abapantekote zo mu murwa mukuru wa Cameroun, Yaounde, no mu majyaruguru y’uburengerazuba bw’uwo murwa mukuru, ahagaragara umubare munini w’abakirisitu mu gihugu cya Cameroun.

Kugeza ubu insengero zirenga 50 zimaze gufungwa, hakaba hari intego yo gufunga izikabakaba 100 mu tundi duce tw’igihugu cya Cameroun. Mu kiganiro Mbu Anthony Lang, umwe mu bagize Guverinoma ya Cameroun yagiranye na televiziyo ya CNN tariki 15/08/2013, yavuze ko Leta ye itazihanganira na gato abo bapasitoro bakoresha nabi izina rya Yezu bica abaturage.

Ati “Tuzaca intege abo biyita abapasitoro b’abapantekote bakoresha nabi izina rya Yezu Kirisitu bahimba ibitangaza bakica abaturage mu nsengero za bo”.

Yongeyeho ko mu gihugu cya Cameroun hari insengero zikabakaba 500, ariko izitagera kuri 50 ni zo zemewe n’amategeko.

Tariki 11/08/2013 umwana w’umukobwa w’imyaka icyenda yapfiriye mu masengesho mu rusengero rw’abapantekote rwo mu mujyi wa Bamenda rwitwa Winners’ Chapel.

Nyina w’uwo mwana, Mih Theresa, yabwiye CNN ko pasitoro yashakaga kwirukana amashitani yari muri uwo mwana. Ati “Ndashaka ko Guverinoma ihagarika abo bapasitoro bakoresha imbaraga zidasanzwe bakurura abakirisitu bikabaviramo gupfa. Abana banjye bose bavuye muri Kiriziya Gatorika bashaka ibitangaza”.

Undi mukirisitu wo muri icyo gihugu witwa Mveng Thomas avuga ko yatandukanye n’umugore we bari barasezeranye nyuma y’aho umupasitoro w’umupantekote ategetse uwo mugore gutandukana n’umugabo we. Yongeyeho ko uwo mupasitoro yabwiye umugabo we ko ari ishitani itarihana, ari na yo mpamvu yagombaga gutandukana na we.

Abapasitoro bo mu mijyi ya Bamenda na Douala tariki 14/08/2013 bakoze urugendo rwo kwamagana icyemezo cya Guverinoma, bakavuga ko Guverinoma ibona ubwinshi bw’amadini nk’ikibazo kuri yo.

Boniface Tum, umushumba w’urusengero rwo mu murwa mukuru Yaounde rwitwa Christian Church of God, avuga ko perezida Biya atangiye kubangamira uburenganzira bw’amadini. Ati “Guha uburenganzira Abagatolika, Abaperesibiteriyeni, abaBatisita, Abayisilamu n’andi madini make, ni ukubangamira uburenganzira bw’amadini”.

Insengero zizafungwa ahanini usanga ngo zarahoze ari amazu y’abantu bagiye bahindura insengero.

Cyprien M. Ngendahimana