Chérubin Okende yari yeguye ku mwanya wa Minisitiri ushinzwe ibijyanye n’ubwikorezi (transports) mu kwezi k’Ukuboza 2022, kugira ngo ashyigikire kandidatire y’umukandida utavuga rumwe na Leta mu matora ya Perezida wa Repubulika.

Nk’uko byatangajwe n’abantu ba hafi ba Moïse Katumbi, ku wa Gatatu M. Okende yagiye ku rukiko rushinzwe kurinda Itegeko Nshinga, kuva ubwo abo mu muryango we ntibongeye kubona amakuru ye ukundi, nyuma umurambo we ngo wabonetse ku wa Kane uri mu modoka, kuri umwe mu mihanda minini y’i Kinshasa.

Abinyujije ku rubuga rwa Twitter, Minisitiri w’Itumanaho, akaba n’umuvugizi wa Guverinoma ya Repubulika ya Demokarasi ya Congo, Patrick Muyaya yagize ati “Guverinoma yakiranye umubabaro amakuru yo kwicwa kwa Chérubin Okende, iboneraho no kwamagana icyo gikorwa kigayitse, isaba inzego z’umutekano gukorana ubushishozi mu iperereza, kugira ngo bashobore kugaragaza ukuri kuri icyo gikorwa kidakwiye kwihanganirwa”.

Uwo munyapolitiki yishwe mu gihe n’ubundi muri icyo gihugu hari umwuka utari mwiza, ibyo ngo bikaba biterwa ahanini n’uko amatora ateganyijwe mu mpera z’uyu mwaka wa 2023 agenda yegereza.

M. Okende w’imyaka 61, yari yaravuye ku mwanya we nka Minisitiri w’ubwikorezi mu Kwezi k’Ukuboza 2022 hamwe n’abandi ba Minisitiri babiri bashyigikiye Katumbi.

Moïse Katumbi nibwo yari akimara gutangaza ko aziyamamaza mu matora ya Perezida wa Repubulika, ateganyijwe mu Kwezi k’Ukuboza 2023. Perezida Félix Tshisekedi, uri ku butegetsi guhera muri Mutarama 2019, na we ngo azaba ari umukandida muri ayo matora.