Ni igikorwa cyabaye kuri uyu wa Gatatu tariki 7 Ukuboza 2022, uwo Dina Boluarte wasimbuye Pedro Castillo, akaba ari umugore wa mbere ubaye perezida wa Peru, igihugu kimaze iminsi gifite ibibazo bya politike.

Ari imbere y’inteko ishinga amategeko, Perezida mushya wa Peru, Dina Boluarte yagize ati: " Ngiye ku butegetsi hakurikijwe ibiteganywa n’itegeko nshinga rya Peru, uhereye ubu kugeza muri Nyakanga 2026”. Muri Nyakanga 2026, nibwo manda ya Pedro Castillo, yari iteganyijwe kurangira.

Pedro Castillo w’imyaka 53 y’amavuko, yahise afatwa n’inzego z’umutekano, nk’uko umushinjacyaha Marita Barreto, yabitangarije itangazamakuru, nyuma y’amashusho yari yagaragaje Perezida Pedro Castillo yicaye mu ntebe, akikijwe n’Abapolisi n’Abashinjacyaha.

Nk’uko byatangajwe n’ibinyamakuru by’aho muri Peru, Pedro Castillo ngo yahise ashyirwa mu ndege ya Kajugujugu ajyanwa mu kigo cyihariye cya Polisi mu Mujyi wa Lima, aho agomba kumara iminsi itarenga 15, mu gihe ubushinjacyaha buri mu iperereza.

Ubushinjacyaha bwatangarije Ibiro ntaramakuru by’Abafaransa ‘AFP’, ko ubu iperereza ryatangiye kuri Pedro ku byaha akurikiranyweho birimo no kugerageza gusesa inteko ishinga amategeko, ibyo bikiyongera ku yandi maperereza arimo kumurwaho yerekeye ibyaha bya ruswa, n’ibindi byaha akurikiranyweho we na bamwe mu bo bakorana ndetse na bamwe mu bo mu muryango we.