Umuganda witabiriwe n’Abanyarwanda baba muri Mozambique, abaturage ba KaMavota (Costa do Sol na Albazina), ndetse n’abakozi ba Standard bank, bakaba bateye ibiti 250, ariko igikorwa kikaba kizakomeza aho hateganyijwe ko hazaterwa ibiti 2,056 kuri uwo muhanda.

Ambasade y’u Rwanda ifatanyije n’Abanyarwanda baba muri Mozambique, imaze igihe itegura ibikorwa nk’ibi by’umuganda, hakorwa isuku mu gutoragura amashashi, gusibura imihanda n’imiferege ndetse no gutera ibiti, aho baherutse gutera ibiti 80 by’imbuto ku Kigo cy’ishuri ryisumbuye rya Polana, ku wa 02 Nyakanga 2022.

Mu bafashe ijambo rijyanye n’iki gikorwa, barimo Ubuyobozi bw’Umujyi wa Maputo, uhagarariye Ubuyobozi bwa Ambasade y’u Rwanda muri Mozambique, ndetse n‘Umuyobozi mukuru wa Standard Bank, bagarutse ku kamaro k’igikorwa n’icyo bizafasha mu kubungabunga ibidukikije bifitiye ikiremwamuntu akamaro, cyane cyane mu gukumira ingaruka zijyanye n’ihindagurika ry’ikirere (climate change).

Ambasade y’u Rwanda yagaragaje ko izakomeza gushyikira no gufatanya na Mozambique mu bikorwa nk’ibyo bibungabunga ibidukikije n’ubuzima bw’abantu.

Ahatewe ibiti ni ku muhanda mushya uzenguruka Umujyi wa Maputo (ring road) mu gice giherereye iburasirazuba, aho uwo mujyi ukora ku nkombe z’inyanja nini y’u Buhinde (Indian Ocean), igice gikunda kugaragaramo umwuzure mu gihe cy’imvura.