APR VC yavanye umwanya wa gatandatu muri Madagascar

13-04-2013 - 11:00' | Ibitekerezo ( )

Ikipe ya APR Volleybal Club y’abagore yatahukanye umwanya wa gatandatu mu mikino y’igikombe cya Afurika ihuza amakipe yabaye aya mbere iwayo, yasojwe ku wa Gatanu tariki 12/4/2013 i Antananarivo muri Madagascar.

Nyuma yo gusezererwa muri ¼ cy’irangiza itsinzwe na Al Ahly yo mu Misiri, APR VC yakinnye imikino yo guhatanira umwanya kuva ku wa gatanu kugeza ku wa munani.

Nyuma yo gutsinda Ndejje University yo muri Uganda amaseti 3-0, APR ntabwo yorohewe na Pipeline yo muri Kenya, kuko yatsinze APR VC amaseti 3-0 (25-14, 25-17, 25-15), bituma Pipeline ifata umwanya wa gatanu, naho APR VC ifata umwanya wa gatandatu.

Prisons yo muri Kenya ni yo yegukanye igikombe.

Umukino wa nyuma w’iri rushanwa ryamaze ibyumweru bibiri, wahuje Prisons yo muri Kenya na GS Petroliers yo muri Algeria.

Muri uwo mukino wabereye ahitwa Palais des Sport i Antananarivo ukarebwa n’abantu basaga ibihumbi 3500, wari ukomeye cyane kuko hakinwe amaseti atanu kugirango hamenyekane ikipe itwara igikombe.

Prisons yari imaze gutwara igikombe inshuro eshatu yikurikiranya, yongeyeho n’icya kane nyuma yo kwerekana ko ihagaze neza muri iki gihe igatsinda GS Petroliers ariko bigoranye amaseti 3-2 (25-21, 20-25, 25-19, 20-25, 15-6).

Umwanya wa gatatu muri iryo rushanwa wegukanywe na Al Ahly yo mu Misiri, nyuma yo gutsinda MB Bejaia yo muri Algeria amaseti 3-0 (25-21, 25-19, 25-21).

Dore uko amakipe yakurikiranye muri iryo rushanwa: 1. Prisons (Kenya), 2. GS Petroliers (Algeria), 3. Al Ahly (Egypt), 4. MB Bejaia (Algeria), 5. Pipeline (Kenya), 6. APR (Rwanda), 7. FAP (Cameroon), 8.

Ndejje University (Uganda), 9. Stef Auto (Madagascar), 10. Water Sport (Ethiopia), 11. Kutlwano (Botswana), 12. AS Tanda (Cote d’Ivoire), 13. VB Diamant Club (Madagascar), 14. Manga Sport (Gabon), 15. Les AS (Burundi)

Theoneste Nisingizwe