APR VC ihagarariye u Rwanda muri iyo imikino, yagiye mu rwego rw’amakipe ahatanira imyanya myiza, nyuma yo gusezererwa muri ¼ cy’irangiza itsinzwe na Al Ahly yo mu Misiri amaseti 3-0.

Nk’uko amategeko agenga amarushanwa ya Volleyball abiteganya, amakipe asezerewe arahura hagati yayo, hakamenyekana uko akurikirana kuva ku mwanya wa gatanu kugeza ku mwanya wa 15 uhwanye n’umubare w’amakipe yitabiriye irushanwa.

Mu guhatanira umwanya hagati y’uwa gatanu n’uwa munani, tariki 10/04/2013 APR VC yatsinze Ndejje University amaseti 3-0 (25-15, 25-21, 25-18). Ndejje University nayo yari yageze muri ¼ cy’irangiza ariko ntiyaharenga kuko yasezerewe na GS Petroliers yo muri Algeria.

Kugirango ishimangire umwanya wa gatanu, APR VC igomba gutsinda umukino ifitanye na Pipeline yo muri Kenya kuri uyu wa kane tariki 11/04/2013 guhera saa kumi n’ebyiri.

APR nitsinda irafata umwanya wa gatanu, nitsindwa ifate umwanya wa gatandatu ari nawo yatahukana. Pipeline iza gukina na APR VC, yo yasezereye FAP yo muri Cameroun iyitsinze amaseti 3-0 mu hugatanira umwanya hagati y’uwa gatanu n’uwa munani.

Mu mikino ya ½ cy’irangiza yakinwe kuri uyu wa gatatu tariki 10/04/2013, Priosons yo muri Kenya inafite ibikombe bine yasezereye MB Bejaia yo muri Algeria iyitsinze amaseti 3-0 (25-16, 25-15, 25-22)
Prisons izakina umukino wa nyuma, uzaba kuri uyu wa gatanu tariki 12/04/2013, na GS Petroliers yo muri Algeria yaraye itsinze Al Ahly yo mu Misiri amaseti 3-0 (25-23, 25-22, 25-18).

Theoneste Nisingizwe