Cristiano agize hat-tricks 22 (gutsinda ibitego bitatu cyangwa birenga mu mukino umwe) akaba anganya na Alfredo Di Stefano ndetse na Telmo Zarra bari baraciye agahigo muri shampiyona ya Espange, mu gihe Lionel Messi bahanganye nk’abakinnyi beza ku isi we afite hat-tricks 19, akaba anganya na Edmond Suarez bakurikiraho mu gutsinda Hat -tricks nyinshi muri La liga.

Igikomeje gutungura benshi ku buhangange bw’uyu mukinnyi ni uko mu mikino 3 mu mikino 4 Real Madrid imaze gukina yikurikiranya idatsindwa muri Shampiyona yabashije gutsindamo ibitego 10, aho muri buri mukino yatsindagamo ibitego 3 wenyine hakaba hari n’aho yatsinze 4.

Ubwo bakinaga umukino wa shampiyona n’ikipe ya Atletico Bilbao kuri uyu wa 05/10/2014, I Santiago Bernabéu ku kibuga cyayo, Real Madrid yabashije gutsinda ibitego 5-0 birimo ibitego 3 bya Cristiano Ronaldo na 2 bya Benzema.

Cristiano yafunguye amazamu ku munota wa 2, kuwa 55 atsinda icya kabiri, ku munota wa 88 niho yatsinze igitego cya cya 3, mu gihe bibiri bisigaye byatsinzwe na Karim Benzema ku munota wa 41 n’uwa 69.

Ibitego 4 mu mukino umwe Cristiano yabitsinze ubwo bakinaga n’ikipe ya Elche kuwa 23/09/2014 ubwo bayitsindaga ibitego 5-1.

Naho ubwo bakinaga n’ikipe ya Deportivo La Corona kuwa 20/09/2014 umukinnyi Cristiano akaba nabwo yaratsinzemo ibitego 3 mu bitego 8-2 ikipe ye yatsinze Deportivo La Corona.

Kuri ubu mu mikino 7 muri Shampiyona ikipe ya Real Madrid yakinnye imaze gutsindwamo imikino 2 gusa yatsinzwe igitangira Shampiyona aho umwe yawutsinzwe na Real Sociedad 4-2, undi iwutsindwa na Atletico Madrid 2-1.

Muri marushanwa y’amakipe yabaye aya mbere iwayo ku mugabane w’I Burayi, Real Madrid ntiratsindwa na rimwe mu mikino 2 imaze gukina, nabwo Cristiano akaba yaragiye atsinda igitego kimwe kimwe muri buri mukino bakinnye yaba uwo batsinzemo Basel 5-1 ndetse n’uwo batsinzemo Ludogolets 2-1.

Safari Viateur