Ibi byagaragaye cyane ubwo u Rwanda rwakinaga na Tanzania mu mukino ubanza, aho u Rwanda rwatsinze Kilimanjaro Stars igitego kimwe ku busa cyatsinzwe na Karekezi Olivier.

Muri uyu mukino, Haruna Niyonzima bahimbye ‘Fabregas’ kubera ubuhanga n’amacenga agira mu kibuga, yafataga umupira abafana ba Yanga bakamuririmba batitaye ku ikipe y’igihugu cyabo.

Aganira n’ikinyamakuru Mwanaspoti cyo muri Tanzaniya, Haruna yatangaje ko yishimira ko buri gihe abafana ba Yanga baba bamuri inyuma kandi ko agerageza gukora ibyo bashaka; Haruna ariko avuga ko byaba byiza muri uyi CECAFA bafannye ikipe y’igihugu yabo.

Yagize ati “Iyo numva abantu bakoma amashyi abandi baririmba kubera uburyo nkina biranshimisha ariko ndumva ubu bwo bashatse bafana ikipe y’igihugu cyabo”.

Gufana abakinnyi basanzwe bakinira amakipe yo muri Tanzaniya ntibyakozwe n’abafana ba Yanga gusa kuko n’aba mukeba wayo Simba babikoze ubwo umukinnyi wayo witwa Emmanuel Okwi yakiniraga ikipe y’igihugu cye cya Uganda.

Mu mukino wahuje Uganda n’ikipe ya Zanzibar nayo yo muri Tanzania, abafana baririmbaga umukinnyi wabo Emmanuel Okwi. Umukino warangiye Uganda itsinze Zanzibar ibitego bibiri kuri kimwe.

Iyi myifanire idasanzwe ikunda kugaragara muri iki gihugu bitewe n’uburyo abafana ba Yanga na Simba bakunda amakipe yabo. Iyo hari bamwe mu bakinnyi b’imwe muri izi kipe udahamagawe mu ikipe y’igihugu kandi bamuziho ubuhanga, iyo Taifa stars ikinnye n’indi kipe y’igihugu, abafana bifanira abakinnyi b’ayo makipe bakinira ibihugu byabo bakirengagiza ikipe y’igihugu cyabo.

Theoneste Nisingizwe