Muri iri tangazo yagize ati "Siyansi yaduhaye ibikoresho byo kurwanya icyorezo cya Covid-19. Isi ibisaranganyije uko bikwiye, dushobora guhagarika umuvuduko wa Covid-19 muri uyu mwaka".

Muri urwo rwego, Ghebreyesus arasaba ibihugu bikize gutanga umusanzu wabyo bigomba mu mugambi wa ACT-A, kugira ngo ufashe n’ibihugu bikennye gukingira abaturage babyo bose, kubapima no kubabonera imiti.

ACT-A yashinzwe n’ibigo mpuzamahanga by’ubuzima, Banki y’isi na Fondation Bill and Melinda Gates, iyobowe na OMS. Igamije kugeza byihuse ku bihugu bikennye ibikoresho byo kurwanya Covid-19.

Imwe muri gahunda zayo ni Covax, igomba guha ku buntu inkingo za Covid-19 ibihugu 92 bikennye, hagati mu kwezi kwa mbere gushize, Covax yari imaze gutanga dose miliyari imwe.

Umugambi wa ACT-A ukeneye ingengo y’imari y’Amadolari ya Amerika miliyari 23,4 ku gihe cy’umwaka, guhera mu kwezi k’Ukwakira 2021 kugera muri Nzeri 2022, gusa uracyabura amadolari miliyari 16.

Perezida wa Afurika y’Epfo, Cyril Ramaphosa na Minisitiri w’Intebe wa Norvège, Jonas Gahr Støre, bafatanyije kuyobora akanama gakuriye ACT-A, barayasaba ibihugu 55 bikize n’ibimaze kugera hagati mu bukire.

Mu ibaruwa bandikiye ibyo bihugu, bagize bati "Ubusumbane mu nkingo za Covid-19, mu bikorwa byo kuyipima no ku miti ni bwo butuma icyorezo gitinda gucika. Turasaba abayobozi gutanga umusanzu wabo, kugira ngo tubashe kurengera ubuzima bwacu twese hamwe."

Kugeza ubu ibihugu bitandatu byonyine ni byo byarangije kuzuza inshingano zazo ku ngengo y’imari ya ACT-A, Ibyo ni Canada, u Budage, Kowete, Noruveje, Arabiya Sawudite na Suwede.