Umuyobozi w’akarere ka Rubavu wungirije ushinzwe ubukungu n’iterambere, Buntu Ezechiel Nsengiyumva, avuga ko abaturage baciwe amande bagahabwa gitansi z’imirenge ari amakosa yakozwe n’abayobozi kandi bagomba guhanirwa.

Ibi bije nyuma y’uko abaturage bo mu murenge wa Nyakiriba bagaragaje akarengane bakorerwa n’umurenge wohereza abashinzwe umutekano (Local Defence) kubaca amande y’uko badafite ibiraro mu gihe inka zabo zitazerera ahubwo ziba ziziritse.

Izi gitansi zatanzwe n’umurenge kandi izemewe zitangwa n’akarere. Ikindi nuko amafaranga atangwa atagira ikigero kuko atandukanye bitewe n’uko umuntu ahagaze.

Abaturage bavuga ko aba bashinzwe umutekano inka bazisanga aho ziziritse bakazizitura bakazitwara umuturage akajya kuyigarura abanje gutanga amande ashyikiriza abayobozi b’utugari bagatanga gitansi z’imirenge.

Cyakora umuyobozi wungirije w’akarere ntiyemera ko umuyobozi washyiriweho kuyobora no gufasha abaturage yajya kuzitura inka y’umuturage ngo arashaka kumuca amande, akavuga ko nyuma yo kwandikirwa n’abaturage bagiye gukora igenzura kandi bibaye byo ababikoze bazahanwa.

Gitasi zemewe zitangwa n’akarere.

Iki kibazo kimaze igihe kitari gito nkuko bigaragara kuri gitansi Kigali Today ifitiye copi, nyamara umuyobozi w’akarere wungirije avuga ko iyo umuturage aciwe amande ashyirwa kuri konti y’akarere kugira ngo aya mafaranga azagirire igihugu akamaro, akavuga ko niba hari abaturage bahabwa gitansi z’imirenge bazishyikiriza akarere kakabakurikirana.
Abaturage bo mu murenge wa Nyakiriba bandikiye ubuyobozi bavuga ko bacyeneye kurenganurwa nkuko bigaragara mu ibaruwa Kigali Today yashoboye kubona.

Bamwe mu baturage bavuga ko bamaze gucibwa intege n’amande asabwa n’umurenge kuko bamwe mu bahawe inka muri gahunda ya Girinka nabo bakwa aya amafaranga kandi ntaho kuyakura bafite.

Ibaruwa abaturage bo mu murenge wa Nyakiriba bandikiye ubuyobozi bw’akarere ka Rubavu basaba kurenganurwa.

Abandi baturage badashaka gutangaza amazina yabo bavuga ko baciwe amande bakabura ayo kwishyura bakaguza bamara kubona inka bagahita bazigurisha kuko inka zifatwa ziba zitazererezwa ahubwo ziba ziziritse bakavuga ko buri muturage atagira ikiraro kandi ngo inka iba mu kiraro inakenera gusohoka.

Cyakora bamwe mubayobozi b’utugari batanga izi gitasi bavuga ko babikora babisabwe n’akarere kuko na Gitansi ariho zikomoka nkuko bigaragara kuri kasha.

Sylidio Sebuharara