Nsabimana Davide ni umwe muri abo ba local defense aravuga ko bagiye gukomeza gufatanya n’abandi baturage mu gucunga umutekano w’igihugu, ari nako akomeza gucunga neza ibyo yakuyemo.

Yagize ati “muri aka kazi nakuyemo uruhushya rwo gutwara moto, nkuramo amafaranga yo kubaka inzu ndetse nguramo n’imirima igera kuri itatu”.

Uyu mugabo avuga ko nyuma yo gusezererwa mu kazi ubu agiye kugura moto maze agakora akazi k’ubumotari, ndetse akaba anateganya ko mu myaka y’imbere azagura imodoka ye akazajya ayikoresha mu kazi gatandukanye.

Majoro Karasira John, wungirije uhagarariye ingabo mu karere ka Bugesera yababwiye ko umuntu wese ukora mu nzego z’umutekano aba ari umusivile nk’abandi ariko watojwe.

Ati “igihe kiragera agasubira mu buzima busanzwe, ndabasaba gukorana neza n’abaturage musanze b’abasivile mukomeze gukorana nabo gucunga umutekano”.

Umuyobozi w’akarere ka Bugesera, Rwagaju Louis, yabasabye gukomeza kugira indangagaciro yo kubungabunga umutekano w’igihugu nk’inshingano ndetse no gukorera hamwe kugira ngo biteze imbere, kandi ko akarere kazabafasha mu makoperative bazashinga.

“Turabashimira akazi keza mwakoze, ariko turanasabasa kudatezuka ku mugambi wo kubaka igihugu bafatanya n’inzego mu gukumira ibyaha batanga amakuru”, Rwagaju.

Akarere ka Bugesera kari gafite aba Local defense 578, aba bakaba bagiye gusimburwa n’urwego rwa DASSO.

Egide Kayiranga