Ambasaderi w’u Buyapani mu Rwanda, Kazuya Ogawa, yabwiye itangazamakuru ko kuza mu Rwanda kwa Ministiri wabo wungirije ushinzwe ububanyi n’amahanga akaba ari no mu bagize inteko ishinga amategeko, ngo bivuze ko u Buyapani buzaha agaciro ibyo kwigisha abaturage b’icyo gihugu ndetse n’abo mu bindi bihugu bitandukanye byo ku isi, ububi bwa Jenoside.

“Ibyabaye mu Rwanda mu myaka 20 bituma twumva akamaro ko kubungabunga amahoro no kwirinda Jenoside aho ari ho hose, dutanga ubutumwa busaba abantu ko ibi bitazongera kubaho, kandi kuba Ministiri asuye urwibutso, bivuze ko Abayapani ndetse n’ibindi bihugu, bagiye kumva ububi bwa Jenoside”, nk’uko Amb Kazuya yabitangaje.

Yavuze ko Abayapani bazakomeza kwigisha isi ububi bwa Jenoside yakorewe Abatutsi mu Rwanda na bombe atomike zatewe muri icyo gihugu ahitwa Hiroshima na Nagasaki, mu ntambara ya kabiri y’isi.

Abashoramari b’Abayapani baje mu Rwanda kwiga uburyo bashobora kuza kuhakorera.

Abayobozi b’u Buyapani kandi kuri uyu wa gatatu tariki 28/08/2014 banasuye urwibutso rwa Jenoside ruri ku Gisozi, nka bamwe mu nshuti zarwo zirimo kurwagurira inyubako, mu rwego rwo kurugira ikigo nyafurika mpuzamahanga cyigisha iby’amahoro, nk’uko biri mu migambi miremire y’Umuryango wa AEGIS Trust wita kuri urwo rwibutso.

Visi Ministiri Ishihara yaje azanye n’abashoramari bagera kuri 50 bo mu gihugu cye, bakiriwe n’Ikigo cy’iterambere RDB kibasobanurira amahirwe yo gukorera mu Rwanda; harimo kuba hari umutekano, kuba u Rwanda rufite umwanya wa 32 ku isi mu korohereza abashoramari kuko ngo mu masaha 48 umuntu aba arangije kwandikisha ubucuruzi bwe, hamwe no kuba ivunjisha mu gihugu ridakunze guhindagurika.

RDB igaragaza ko hari n’andi mahirwe ava ku kuba u Rwanda ruri mu muryango wa Afurika y’uburasirazuba (EAC), aho ibihugu by’u Rwanda, Uganda na Kenya byemeje kubaka umuyoboro wa peterori, inzira za gari ya moshi n’amashanyarazi ahagije muri buri gihugu muri ibyo bitatu.

Ministiri w’ububanyi n’amahanga w’u Buyapani, Hirotaka Ishihara ashyira indabo ku mva zo ku rwibutso rwa Jenoside rwa Kigali.

Abashoramari b’Abayapani baje mu Rwanda, barimo abanyenganda zikora ibintu bitandukanye n’ibigo bikora ubwubatsi, ibikora ubujyanama n’ubushakashatsi ndetse n’ibicuruza ibikomoka mu nganda zo mu Buyapani.

Mu cyumweru gishize u Rwanda rwanasuwe n’abadepite b’u Buyapani bari baje gutsura umubano hagati y’ibihugu byombi, ndetse banasuzuma uko inkunga ikoreshwa mu bwubatsi bw’ikiraro cya Rusumo no guteza imbere ishuri rya Tumba College; bikaba ngo byari mu rwego rwo kongera inkunga baha u Rwanda, nk’uko byatangajwe na Ambasaderi w’u Rwanda mu Buyapani, Dr Charles Muligande.

Simon Kamuzinzi