Mu gihe cya Jenoside hari abayobozi muri ADEPR batatabaye cyangwa ngo batabarize abo bari baragijwe ahubwo babasiga mu menyo y’Interahamwe barigendera, ndetse bamwe muri bo bajya no hanze y’igihugu kandi bari bararahiriye kuzababarana n’umukumbi no kutazawutererana mu makuba.

Ibyo ni ibyavuzwe n’umuvugizi w’ihururiro ry’amatorero ya Pentecôte mu Rwanda (ADEPR), Pasteri Sibomana Jean, mu muhango wo guha inshingano z’ubupasiteri abantu 7, umuhango wabereye muri Paruwasi ya Kamembe, mu karere ka Rusizi tariki 15/06/2014.

Abapasiteri bimitswe hamwe n’abafasha babo basengewe ngo bazafatanye kuragira umukumbi.

Abahawe inshinagano z’ubushumba ni Nzigiyimfura Anaclet, Mazimpaka Céléstin, Ndagijimana Théobald, Mazimpaka Janvier, Ndwaniye Pierre Claver, Nsengumuremyi Fabien na Uwihoreye Erneste.

Nyuma y’uko abashakanye n’abo bahawe izo nshingano bamaze kwemera ko batazabananiza muri iyo mirimo, mu kubaha inshingano, umuvugizi wa ADEPR, Pasiteri Sibomana Jean yabasabye ibintu byinshi birimo kuba inyangamugayo , kugendera mu kuri mu byo bakora byose no gukunda abo bayobora.

Yabasabye gutandukana na bamwe mu bari abayobozi mu gihe cya Jenoside yakorewe Abatutsi barenze ku nshingano itorero ryari ryarabahaye zo gukunda abo bayoboye no kubabarana na bo mu gihe cy’amakuba, ntibagire icyo bamarira abo bari bashinzwe igihe bicwaga kandi nyamara ari ho bari babakeneye cyane, ahubwo bakabasiga bakigendera, bamwe mu ri bo bakaba bibereye mu bihugu by’i Burayi.

Umushumba mukuru w’itorero rya ADEPR yasengeye abahawe ubushumba.

Pasiteri Sibomana Jean yavuze ko bidashoboka ko umupasiteri yayobora umukumbi adakunda, bivuze ko abahawe inshingano bagomba kubanza gukunda abo bashinzwe.

Yanavuze ko mu gihe cya Jenoside yakorewe Abatutsi muri Mata 1994, hari abayobozi bagaragaye batari abayobozi, bagira intege nke batererana umukumbi, avuga ko bene abo nta rukundo rw’umukumbi nta n’urukundo rwa kirisito bari bafite.

Umuvugizi wa ADEPR yavuze ko ibyabaye ari itorero ari n’Abanyarwanda bose babikuyemo amasomo menshi atuma abayobora iryo torero muri iki gihe bagomba kuba koko ari abazwiho gukunda abo bayobora.

Umushumba w’itorero rya ADEPR yahaye abashumba bashya impano y’ijambo ry’Imana bazigfashisha mu kuragira abakirisito.

Umwe mu bahawe izo nshingano Pasiteri Ndagijimana Théobald yavuze ko nk’uko babisabwe n’umuvugizi wa ADEPR bazakunda abo bashinzwe kandi batazigera babatererana na rimwe, aboneraho gusaba abakirisito bose kuzababa hafi mu masengesho, bakazanafatanya mu byo bazabakeneraho byose hagamijwe kubaka umukirisito n’umuturage mwiza.

Itorero rya ADEPR Kamembe ryashinzwe mu 2007 ribyawe n’irya Gihundwe ritangira ari itorero rirerwa ubu rikaba ritakirerwa, rifite imidugudu 4.

Umushumba w’iri torero Pasiteri Murenzi Janvier yatangaje ko n’ubwo rivutse vuba riragenda ritera imbere, mu byo ryishimira rimaze kugeraho hakaba harimo urusengero ruzatahwa vuba, ngo rukazuzura rutwaye arenze miliyoni 300 z’amafaranga y’uRwanda.

Musabwa Euphrem