Iki gikorwa cyabaye mu birori byo kwizihiza umunsi w’ibiribwa wabereye mu karere ka Ngororero mu murenge wa Hindiro ku rwego rw’Igihugu, kuri uyu wa Gatanu tariki 18/10/2013.

Abaturage n’abayobozi batandukanye kandi banakoze umuganda wo gushyira ifumbire kugihingwa cy’ibigori ubu gifite uruhare runini mu bukungu bw’abahinzi no mumafunguro aboneka mu Rwanda, bakora uturima tw’igikoni ndetse batera ibiti by’imbuto bitandukanye.

Mu gihe insanganyamatsiko y’uyu mwaka yerekeza ku kwihaza mubiribwa no kurwanya imirire mibi, bamwe mu baturage bo mu karere ka Ngororero batangaza ko kuri ubu ibiribwa bidahagije n’ibiciro bikaba bizamuka ku buryo butigeze bubaho muri aka karere.

Urugero batanga ni aho ikirlo cy’ibishyimbo ubundi bimenyerewe mu mafuro ya buri munsi y’Abanyarwanda kigeze ku mafaranga 550 bwa mbere mu mateka y’aka karere.

Bamwe muri bo barya rimwe ku munsi, mu gihe nyamara bifuza gukora ku munwa inshuro byibura eshatu, cyane cyane kubakiri bato, nk’uko babitangaza.

Gusa ikibazo bakibona ku bihe byahindutse ariko bamwe bagasanga banakwiye gukomorerwa guhinga ibihingwa bashaka babivangira mu mirima kuko ngo iyo kimwe kiteze ikindi cyera.

Hanasuwe umuhinzi w’urutoki ntangarugero wo mu murenge wa Ngororero witwa Munyaneza Alphonse ubu wigisha n’abandi baturage guhinga urutoki kuburyo buvuguruye n’ubushya akaba ageze no ku rwego rwo kujya kwigisha no muzindi ntara abifashijwe mo na RAB.

Minisitiri Karibata yasabye abaturage kwitabira gukora ubuhinzi bw’umwuga kuko aribwo buzabafasha kurwanya inzara no kwihaza mu biribwa, bagateganya uko bazuhira ibihingwa byabo igihe imvura izaba yabaye nkeya cyangwa yabuze.

Ernest Kalinganire