Abagaragaje iki kibazo, bavuga ko nta gushidikanya kugirirwa nabi ndetse no kubura burundu byaturutse kuri se wabo witwa Gahenda Bienvenu ubu utuye i Kigali. Icyo bapfa kandi ngo ni imitungo yasizwe na se Rutsindura Alphonse.

Nk’uko bivugwa na Nyiramana Seraphine bakunze kwita Zirakamwa, akaba yari aturanye n’ababyeyi b’uyu Rutsindura, ngo yaburiwe irengero kuva kuwa 09/11/2012.

Jenoside iba, uyu mwana yahungishijwe n’umukozi wabakoreraga, amujyana i Burundi, ari na we watumye arokoka. Yaje kuza mu Rwanda aje gukina umupira hamwe n’urubyiruko rw’Abarundi, hanyuma bagiye gusura urwibutso rwa Jenoside atangira kwibuka iwabo n’ibyahabaye. Icyo gihe abandi bana baratashye we yanga gusubirayo ngo yageze iwabo mu Rwanda.

Amaze kumenya iwabo, yashatse gusubirana imitungo ya se, dore ko ari na we wenyine wacitse ku icumu iwabo, ariko abangamirwa na se wabo wavugaga ko atari umwana wa Rutsindura, ahubwo ari Umurundi. Mu gihe yaburanaga, yarusimbutse inshuro nyinshi, ariko birangira aburiwe irengero.

Mu gihe bavugaga ikibazo cy’uyu mwana, haje gutangwa amakuru ko urubanza rwaburanishijwe adahari ruzasomwa kuri uyu wa kane tariki 11/04/2013. Ibi byababaje abari bitabiriye ibiganiro, bifuje ko urwo rubanza rutahabwa agaciro ahubwo hakabanza hagashakishwa aho yarengeye.

Utamuvuna Aisha na we yababajwe n’ibura ry’uyu mwana. Yagize ati « nta kumushakisha byigeze bibaho. Ku giti cyanjye numva bimbabaje. Numva hakenewe kurenganurwa, tumenye aho umwana yagiye. Icyo twifuza ni uko uru rubanza rwaba ruhagaritswe hakabanza hakagaragazwa aho yagiye».

Ibi kandi byashimangiwe na Dusingizemungu Jean Pierre, Perezida wa IBUKA. Yagize ati « ikiduhangayikishije mu bintu byose ni uko muri urwo rubanza yari arimo, ejo i Nyamirambo ari ho urukiko ruzasoma ibirebana na rwo. Kandi turacyari gushakisha irengero rye. Nifuzaga rero gukora ubuvugizi kugira ngo ibirebana n’uru rubanza bibe bisubitswe, abantu babanze bamenye irengero rye».

Ese koko ni umuhungu wa Rutsindura ?

Mbabazi Norbert, Visi perezida wa IBUKA ku rwego rw’Akarere, avuga ko Umurundi bita se wa Rutsindura yihakaniye ko umwana atari uwe, ndetse ngo hanakozwe n’ibizamini bya ADN bigaragaza ko ntaho bahuriye.

Ikindi, Norbert uyu avuga ko azi uyu mwana yiga mu kiburamwaka, akaba yemeza ko ari umuhungu w’uwo Rutsindura. Yagize ati « umuntu wese uzi Rutsindura ntiyashidikanya ko Alexis ari umwana we, kuko barasa cyane».

Utamuvuna Aisha we yagize ati « niba koko Alexis yari afite se w’Umurundi, ni gute atigeze aza kubaririza aho aherereye kandi yari amaze igihe kinini mu Rwanda. Nta mubyeyi ushobora kureka kujya gushaka umwana we igihe yamubuze».

Uyu mwana w’umuhungu yaburiwe irengero nyuma y’urubanza rwari rumaze imyaka itanu aburana na se wabo. Mu gihe baburanye cyose kandi, ngo uyu mwana yaramutsindaga, akaba ari na ho haje kuva ko atangira guterwa ubwoba, ubundi bakagerageza kumwica, kuko yarusimbutse inshuro eshanu zose.

Rutsindura Alphonse uyu, se wa Rutsindura Alexis, si uwari umwarimu mu iseminari, ahubwo ni uwari umunyamabanga wa Padiri Kagame. Gusa ngo bitiranwaga amazina yombi.

Marie Claire Joyeuse