Muri uyu muhango wabereye mu murenge wa Kagano tariki 29/03/2014, Minisitiri Gasinzigwa yasobanuye ko ishema rikomeye barihawe na Perezida wa Repubulika wabahaye ijambo akabaha kwisanzura no kuba imbarutso nyakuri mu iterambere ry’igihugu, asaba abagore ko bakwiye kumwereka ko icyizere yabagiriye bagikwiye koko.

Yagize ati “umugore ukora , akiteza imbere, agafatanya n’abandi mu kubaka igihugu, akarwanya umwanda, aba yihesha ishema kandi aba ahesha ishema uwaribahaye mbere Nyakubahwa Perezida wa Repuburika na Madamu we”.

Minisitiri Gasinzigwa Oda yasabye abagore kuba umusemburo mu kurwanya umwanda mu ngo no mu bana , avuga ko isuku ku myambaro, ku mubiri ari ingenzi cyane ku bana ko umwana ufite umwanda akura nabi ndetse agakurizamo kurwara bya hato na hato. Yavuze ko ibyo bitashoboka ababyeyi ubwabo batagira isuku kuko isuku igira isoko.

Yagize ati “umugoroba w’ababyeyi ukwiye kubafasha kungurana ibitekerezo bizatuma muzamura imibereho y’ingo zanyu kandi mugafatanya kurwanya abo bose muzi batita ku isuku y’abana babo”.

Minisitiri Gasinzigwa yongeye kwibutsa abagore ko uburinganire n’ubwuzuzanye ari umusingi nyawo w’iterambere.

Uyu muhango wari witabiriwe n’abayobozi mu nzego zitandukanye barimo guverineri w’intara y’uburengerazuba, Mukandasira Caritas n’umuyobozi w’akarere ka Nyamasheke Habyarimana Jean Baptiste.

Muri uyu muhango hakozwe umuganda wo kwerekana ibikorwa byiza ntangarugero mu gusukura mu ngo birimo koza abana, kubogosha kubacira inzara no kubamesera.

Hatanzwe inka 69 ku miryango y’abakene mu rwego rwo kuyiteza imbere, hasuwe ibikorwa ntangarugero abagore bagezeho, harimo inganda zikora ibikomoka ku buhinzi, basura abagore bakora ubwubatsi, ubudozi, gutwara imodoka n’ibindi.

Hatashwe ikigo cyubatswe ku nkunga ya Haguruka mu kurwanya ihohoterwa kiri mu kagari ka Rwesero mu murenge wa Kagano. Ukwezi kwahariwe umugore kwari kwatangirijwe mu karere ka Gisagara mu ntara y’amajyepfo, ku itariki ya 1 Werurwe 2014.

Umugwaneza Jean Claude