Ubu Nikwigize yiga mu kigo cy’abafite ubumuga cya Gatagara mu mwaka wa 6 w’amashuri abanza. Kuva yatangira kwiga yandika akoresheje ibirenge. Uretse kwandika, Nikwigize anakoresha ibirenge iyo arimo kurya cyangwa gukaraba.

Nikwigize ubwe yivugira ko atibuka neza igihe yatangiriye kwandikisha ibirenge ndetse akaba atanazi uko byaje. Agira ati “Ntabwo mbyibuka ariko mama yarambwiye ngo hari igihe nigeze kumwaka ikaramu ndandika. Hari igihe yari ari kuntamika ibiryo hanyuma nabwo mwaka ikanya ndirisha.”

Kwandika akoresha amaguru

Uyu mwana avuga kandi ko kimwe n’abandi bana, yikundira gukina cyane cyane umupira w’amaguru. Avuga ko hari ibintu atabasha kwikorera birimo gukaraba umubiri wose. Avuga ko ibyo ashoboye gukoresha amaguru abyikorera hanyuma ibyo adashoboye agashaka abamufasha.

Abarimu ba Nikwigize bavuga ko yandika neza kandi akandika ku muvuduko nk’uw’abandi banyeshuri bafite amaboko. Nikwigize yandika ibintu bisomeka neza ku buryo utabyiboneye utapfa kwemera ko yabyandikishije ibirenge. Uyu mwana kandi yitwara neza mu ishuri akanatsinda ku buryo umwanya wa kure abona ari uwa gatanu.

Yandika neza kandi ibintu bisomeka

Iyo uganiriye na Nikwigize ubona ko afite icyizere ndetse ubwe yivugira ko afite inzozi n’intego bye. Abisobanura muri aya magambo: “Indoto zanjye ni ukurangiza amashuri yose nkashaka kazi. Nifuza kuzaba umunyamakuru”.

Nikwigize Jean De la Croix avuga ko afite ubutumwa ku bafite ubumuga. Mu magambo make yatanze ubwo ubutumwa ati “Ntibakihebe Imana yabaremye niyo izi uburyo bazabaho”.

No kurya akoresha amaguru

Jacques Furaha