Babisabwe nyuma yo gusura umuhora w’amateka y’urugamba rwo kubohora Igihugu muri gahunda yiswe “Ubumwe bwacu Tour.”

Ubumwe bwacu Tour, ni gahunda yateguwe n’Umuryango w’Abanyeshuri barokotse Jenoside yakorewe Abatutsi (AERG), ku bufatanye n’Inama y’Igihugu y’Urubyiruko n’Akarere ka Rwamagana, hagamijwe gufasha urubyiruko kumenya amateka y’Igihugu no kurwanya ingengabitekerezo ya Jenoside mu rwego rwo gusigasira ubumwe bw’Abanyarwanda.

Ni urugendo bakoze mu minsi ishize aho rwahereye ku mupaka wa Kagitumba ahatangirijwe urugamba rwo kubohora Igihugu, rusorezwa i Gikoba ahari ubutaka bwa mbere ingabo zari iza RPA zafashe bwa mbere mu Rwanda.

I Gikoba ni na ho hari indake yabagamo uwari umuyobozi w’urugamba, hakaba ari na ho hategurirwaga urugamba.

Umuyobozi w’Akarere ka Rwamagana wungirije ushinzwe imibereho myiza, Umutoni Jeanne, yavuze ko impamvu bazanye urubyiruko gusura aya mateka bagira ngo bayigireho kandi bakore cyane kuko bo bafite icyo baheraho.

Yabasabye gukunda Igihugu batizigamye, gukora cyane no kwigira ku mateka y’Inkotanyi bagakora ibigamije kubateza imbere ubwabo n’Igihugu muri rusange.

Ati “Urubyiruko icyo turusaba ni ugukunda Igihugu kuko n’abarubohoye bari bato batari gito, babayeho ubuzima bubi, twabonye aho bagendaga n’amaguru, aho bakoreraga, twabonye ibintu byinshi bavunitsemo uyu munsi byakemutse, urubyiruko icyo turusaba ni uguhindura imikorere.”

Gasore Brave, umwe muri urwo rubyiruko avuga ko aya mateka yayigiyemo byinshi kuko yabonye ko ashobora guhera kuri bike akagera kuri byinshi.

Uru rugendo rwari rurimo urubyiruko rusaga 60 bagizwe n’abanyeshuri mu mashuri ya Kaminuza n’ayisumbuye akorera mu Karere ka Rwamagana ndetse n’abahagarariye urubyiruko mu nama y’Igihugu y’Urubyiruko mu Karere ka Rwamagana.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1822 )