KT TV
Umukinnyi David Luiz wo muri Arsenal yahuye na Perezida Kagame
Perezida wa Repubulika Paul Kagame yakiriye mu biro bye David Luiz ukinira ikipe ya Arsenal yo mu Bwongereza.
David Luiz yageze mu Rwanda mu ijoro rishyira kuri uyu wa gatanu tariki 11 Ukwakira 2019. Yaje muri gahunda ya Visit Rwanda igamije guteza imbere ubukerarugendo bwo mu Rwanda, iyo gahunda u Rwanda rukaba ruyifatanyamo n’ikipe ya Arsenal yo mu Bwongereza.
David Luiz yatangiye gukinira Arsenal muri uyu mwaka avuye muri Chelsea zombie zo mu Bwongereza. Yaje mu Rwanda ari kumwe n’umugore we ndetse na nyina. Akigera i Kanombe ku kibuga cy’indege, yahise yerekeza kuri Kigali Marriott Hotel akaba ari na ho yaraye.
Mu gitondo cyo kuri uyu wa gatanu, yerekeje ku rwibutso rwa Jenoside rwa Kigali ruri ku Gisozi, yunamira inzirakarengane zisaga ibihumbi 250 zihashyinguye.
Kuri urwo rwibutso, David Luiz yanditse ubutumwa mu gitabo cy’abashyitsi bugira buti “Dukeneye kubana mu rukundo, mu mahoro no mu byishimo.”
David Luiz yavuye ku rwibutso rwa Jenoside yakorewe Abatutsi rwa Kigali ruherereye ku Gisozi, we n’itsinda bari kumwe bakomereza muri pariki y’Ibirunga mu majyaruguru y’u Rwanda gusura ingagi.
Biteganyijwe ko David Luiz n’abo bari kumwe baza kurara muri Hoteli igezweho yitwa Singita Kwitonda Lodge ikaba ifite n’indi nyubako yitwa Kataza House yakira umubare munini w’abayigana bashaka kuba hamwe. Iyo Hoteli yitegeye Ibirunga nka Sabyinyo, Gahinga na Muhabura.
Ibitekerezo ( 1 )
Ohereza igitekerezo
|
|
ibi byose ni ukubera ubuyobozi bwza nabandi bazaza