Brig Michael Rosette, yakiriwe na mugenzi we w’u Rwanda General Mubarakh Muganga ku cyicaro gikuru cy’Ingabo z’u Rwanda (RDF), ndetse abonana na Minisitiri w’Ingabo Juvenal Marizamunda.

Mu biganiro byaranze aba bayobozi ku mpande zombi, bijyanye no kurushaho guteza imbere ubufatanye busanzweho hagati y’ibihugu byombi binyuze mu Ngabo za Seychelles n’ingabo n’iz’u Rwanda.

Brig Michael yasobanuriwe byinshi ku rugendo rw’impinduka rw’Ingabo z’u Rwanda (RDF, ndetse n’uruhare rwazo mu iterambere ry’abatutage n’Igihugu muri rusange.

Ubwo yaganiraga n’itangazamakuru, Brig Michael Rosette, yashimangiye ko intego y’uruzinduko rwe ari ugushimangira ubufatanye busanzweho mu by’Ingabo hagati y’u Rwanda na Seychelles.

Yavuze kandi ko muri uru ruzinduko agamije no kuganira ku buryo bwiza bwo gushyira mu bikorwa amasezerano y’ubufatanye mu bya gisirikare yashyizweho umukono umwaka ushize, mu kurushaho cyane gufatanya kongerera ubushobozi ingabo z’ibihugu byombi binyuze mu guhana amahugurwa n’ibindi bitandukanye.

Uru ruzinduko rw’Umugaba w’Ingabo wa Seychelles, rurashimangira ubufatanye bwiyemejwe hagati y’ibihugu byombi mu kurushaho guteza imbere ubutwererane no gufatanyiriza hamwe ibikorwa byose bijyanye n’amahoro n’umutekano.

Mu ruzinduko rwe, Brig Michael Rosette biteganyijwe ko azasura kandi ishuri rya gisirikare ry’u Rwanda rya Gako, riherereye mu Karere ka Bugesera.