Ni ibyemezo impande zombi zafashe ku wa gatandatu tariki 22 Werurwe 2025, hagamijwe gushyigikira agahenge n’ibiganiro byo guharanira amahoro arambye mu Burasirazuba bwa Repubulika Iharanira Demokarasi ya Congo (RDC) bikomeje.

Kuri iki cyumweru tariki 23 Werurwe 2025, nibwo Leta y’u Rwanda ibinyujije mu itangazo ryashyizwe ahagaragara n’ibiro by’umuvugizi wa Guverinoma, yatangaje ko yakiriye neza iki cyemezo.

Ni itangazo rigira riti "U Rwanda rwakiriye neza itangazo rya M23 ryo gusubiza inyuma abarwanyi bayo bari baherereye mu gace ka Walikale, mu rwego rwo gushyigikira inzira z’amahoro ziri kugeragezwa."

Muri iryo tangazo bavuga ko Leta y’u Rwanda yanakiriye neza icyemezo cy’Ingabo za FARDC na Wazalendo, cyo guhagarika ibitero bigabwa ku mutwe wa M23, ari na byo bikunze gutuma uwo mutwe witabara, ukarushaho gufata ibice byinshi by’icyo gihugu.

Ni itangazo rivuga ko u Rwanda rutazigera rutezuka ku gukorana n’impande zose mu kubahiriza ibyo ziyemeje, by’umwihariko ibirebana na gahunda ihuriweho yashyizweho n’Imiryango ya EAC na SADC n’izindi gahunda ziharura inzira igana ku gukemura mu buryo burambye ikibazo cy’umutekano mu Burasirazuba bwa Congo.

Nyuma y’iminsi itatu gusa umutwe wa M23 utangaje ko wafashe Umujyi wa Walikale mu ntara ya Kivu y’Amajyaruguru muri RDC, ku wa 22 Werurwe 2025, Ihuriro AFC/M23 ryongeye kumvikana ritangaza ko ryafashe icyemezo cyo kwimura ingabo zaryo zari ziri muri uwo Mujyi no mu nkengero zaho, hagamijwe kugira ngo ibiganiro bya politiki bibe mu mwuka mwiza, no kubahiriza agahenge kasabwe n’ibihugu bigize imiryango ya EAC na SADC, hagamijwe gushaka igisubizo cy’intambara irimo kubera mu burasirazuba bwa RDC mu nzira y’amahoro.

Itangazo ry’Ihuriro rya AFC/M23, ryahise rikurikirwa n’irya FRDC mu ijoro ryo kuri iyo tariki, ubwo mu buryo butunguranye umuvugizi w’ingabo z’icyo gihugu Maj. Gen Sylvain Ekenge, yumvikanye arisomera kuri televiziyo y’Igihugu (RTNC), avuga ko ingabo za Leta ya RDC, zigiye guhagarika ibitero ku ngabo za M23 bahanganye, banasaba abarwanyi ba Wazalendo kubigenza batyo hagamijwe gushyigikira ibiganiro by’amahoro.

Ni icyemezo umuvugizi w’ingabo za FARDC avuga ko gifashwe, hagamijwe kubahiriza agahenge kasabwe, hagamijwe gushaka igisubizo cy’intambara irimo kubera mu burasirazuba bwa RDC.

Yagize ati "Ni ukugira ngo dushishikarize kureka imirwano no gukomeza inzira za Luanda na Nairobi, n’ibiganiro by’amahoro biheruka gutangirira muri Qatar."

Ibyo guhagarika imirwano kuri FRDC, byanashimangiwe na Thérèse Kayikwamba, Minisitiri w’Ububanyi n’Amahanga wa RDC, mu kiganiro yagiranye n’abanyamakuru ku wa gatandatu, wavuze ko uruhande rwa Leta rwiyemeje guhagarika imirwano vuba bishoboka, kugira ngo barengere abaturage bababaye.