Ubushakashatsi bwatangiye muri 2011 bwakorewe mu Turere twa Musanze, hacukururwa amazi yo munsi y’ubutaka ngo harebwe ingano yayo n’uburyo yabyazwa umusaruro agafasha mu gukemura ikibazo cy’abaturage batarabona amazi meza.

Ubu bushakashatsi bwakozwe n’Ubushinwa mu turere twa Nyabihu, Musanze na Rubavu bwagaragaje ko munsi y’ubutaka bw’u Rwanda hari amazi menshi kandi meza ariko akaba adakoreshwa.

Mu Karere ka Musanze hatunganyijwe amariba 28, mu karere ka Nyabihu bacukurwa amariba 17, mu gihe muri Rubavu hakozwe amariba 13.

Minisitiri Biruta areba ubwiza bw’amazi yacukuwe munsi y’ubutaka

Abaturage bo mu murenge wa Nkotsi, akarere ka Musanze bashyikirijwe ku mugaragaro ayo mariba kuri uyu wa 07 Nzeli 2015, bashimye iki gikorwa kuko baciye ukubiri n’amazi mabi akaba intandaro z’indwara ziterwa n’umwanda.

Musabyimana Mathias, umwe mu baturage bagejejweho n’ayo mazi meza, avuga ko bagiye kongera isuku ikindi ntibazongera kurwara kubera kunywa amazi mabi bavomaga mu migezi.

Ambasaderi y’u Bushinwa mu Rwanda, Shen Young Xiang yijeje ko bazakora andi mariba nk’ayo mu minsi iri imbere kugira ngo Abanyarwanda benshi babone amazi meza.

Ambasaderi w’u Bushinwa ashyikiriza Minisitiri Biruta aya mariba nyuma yo gushyira umukono ku masezerano agenga imicungire yayo

Minisitiri w’umutungo kamere, Dr. Biruta Vincent, ataha ayo mariba, yatangaje ko kuyatunganya biri muri gahunda ya Leta y’u Rwanda yo kugira ngo Abanyarwanda bagire ubuzima bwiza babona amazi meza yo kunywa no gukoresha.

Minisitiri Biruta yakanguriye abaturage kubungabunga ayo mariba kugira ngo atazangirika. Yagize ati “Amariba mushyikirijwe…namwe murasabwa kuyitaho, mukayagirira isuku atazononekara, byaba ngombwa mugateganya no kuyasana.”

Ibarura rusange rya 2012 ryagaragaje ko 73% by’Abanyarwanda ari bo babona amazi meza. Urugendo rwo kugeza amazi meza ku Banyarwanda rukaba rugikomeje.

Minisitiri Biruta avuga ko mu ngamba zafashwe harimo gukomeza gucukura ayo mazi ava mu kuzimu no gufata amazi y’imvura ava ku mazu.

NSHIMIYIMANA Leonard