Tare: Umuganda rusange washijije ibibanza bizubakirwamo abacitse ku icumu bari batuye ahantu habi

28-04-2013 - 10:52' | Ibitekerezo ( )

Mu muganda rusange wabaye tariki 27/04/2013, abaturage b’umurenge wa Tare mu karere ka Nyamagabe basijije ibibanza bizubakwamo amazu azimurirwamo imiryango 12 y’abarokotse Jenoside batishoboye, bari batuye ahantu hashobora kwibasirwa n’ibiza mu buryo bworoshye mu kagari ka Buhoro.

Zinarizima Diogène, umuyobozi w’inama njyanama y’akarere ka Nyamagabe, wari wifatanije n’aba baturage, yabashimiye uburyo bitabiriye uyu muganda ngo kuko bigaragaza ko bazi agaciro kawo ndetse n’agaciro ko guhuriza hamwe imbaraga.

Ati: “Nagira ngo mbashimire igikorwa cy’umuganda muvuyemo. Biragaragara y’uko mwumvise uruhare rwanyu mu iterambere ry’igihugu. Biragaragara y’uko mwumvise gufashanya ibyo aribyo”.

Abaturage bitabiriye umuganda wo gusiza ahazubakirwa abacitse ku icumu batishoboye batuye habi.

Umuyobozi w’inama njyanama y’akarere yashimiye abaturage b’umurenge wa Tare uburyo bafashije abacitse ku icumu mu cyumweru cyo kwibuka Jenoside yakorewe Abatutsi ndetse bakaba banakomeje kubafasha.

Umuyobozi w’akarere ka Nyamagabe, Mugisha Philbert nawe wifatanije n’aba baturage mu muganda, yatangaje ko kuba bahereye kuri iyi miryango 12 bitavuze ko aribo bacitse ku icumu rya Jenoside bakeneye ubufasha burebana n’inyubako gusa kuko hari izindi zikenewe gusanwa hirya no hino, ariko ngo bahereye kuri aba kuko aribo bakeneye kwimurwa byihuse harengerwa ubuzima bwabo.

Mugisha Philbert, umuyobozi w'akarere asaba abaturage kwimuka ahantu habateza ibyago.

Kuko iyi miryango 12 itishoboye ngo ibashe gutanga ingurane z’ibibanza igiye gutuzwamo mu mudugudu, umuyobozi w’akarere yatangaje ko bazayitangira ingurane kuri ba nyiri amasambu igiye gutuzwamo, imirimo yo kubaka ikazatangira baramaze kuyihabwa.

Abaturage muri rusange basabwe kwihutira kwimuka ahantu hose hatuwe hashobora kuba hakwibasirwa n’ibiza kugira ngo barinde ubuzima bwabo butahagendera nk’uko bimaze iminsi bigaragara hirya no hino mu gihugu.

Mugisha yagize ati: “Umuturage utuye nabi, utuye amanegeka ahantu tuvuga habi cyane akwiye kuhava. Twahoze tureba n’abandi batuye hariya mu kabande bakwiye kuzamuka bagatura ku mudugudu, abadafite ubushobozi bakunganirwa, abishoboye bakunganirwa aho kugira ngo ejo bundi umusozi ubagweho. Dufatanye kugira ngo abantu batuye nabi kugira ngo bature neza”.

Abaturage barashimirwa uburyo bitabiriye umuganda.

Ubuyobozi bw’umurenge wa Tare butangaza ko imirimo yo gusiza ibi bibanza izakomeza gukorwa no mu minsi iri imbere kugeza bibashije kuboneka bihagije.

Imirimo yo kubaka izi nzu 12 izakorwa n’Inkeragutabara zishobora gukorana n’abandi bakozi zizaba zikeneye, ndetse umuganda w’abaturage ugakomeza gutangwa aho bibaye ngombwa.

Emmanuel Nshimiyimana