Sheikh Nsangira Abdallahamidu

Ni amarushanwa yatangiye ku wa gatatu akazasozwa kuri iki cyumweru tariki 16 Kamena 2019.

Sheikh Nsangira avuga ko ayo marushanwa agamije kurushanwa gusoma igitabo gitagatifu cya Korowani, mu rwego rwo kugaragariza abatuye mu Rwanda ko ari igitabo gitangaje.

Ati “Ayo marushanwa agaragaza ko bishoboka ko umwana muto w’imyaka itandatu, cumi n’umwe cyangwa makumyabiri ashobora kuba yagifata mu mutwe.”

Ati “Ni igitabo kiva ku Mana. Ugifashe mu mutwe rero arangwa n’ituze, akarangwa n’umunezero, akarangwa no gutungana no kugira igihagararo cyiza imbere y’abantu.

Amarushanwa yitabiriwe n’abanyamahanga 33 baturutse mu bihugu 24, kongeraho Abanyarwanda 18 biganjemo abana bato b’intyoza bari hagati y’imyaka 11 na 21 batoranyijwe mu mashuri atandukanye ya Korowani hirya no hino mu gihugu.

Uzatsinda aya marushanwa ku mwanya wa mbere azahembwa amadolari ibihumbi bibiri na magana atanu, n’abandi na bo bagende bahembwa bitewe n’uburyo bagiye batsinda.

Bamwe mu bitabiriye amarushanwa

Ubusanzwe aya marushanwa ategurwa n’urubyiruko rw’umuryango w’Abayislamu mu Rwanda. Sheikh Niyitanga Djamidu ni we uyoboye icyo gikorwa cyo gutegura ayo marushanwa.

Urwo rubyiruko ruyategura rufatanyije n’Abayobozi b’umuryango w’Abayislamu mu Rwanda. Ni amarushanwa aterwa inkunga n’umukecuru w’umuherwe wo mu gihugu cya Arabiya Sawudite witwa Haya Asaf al Asaf ukunda Abanyarwanda n’Abanyafurika muri rusange.

Afite ibikorwa mu bihugu bya Kameruni, Tchad, Kenya n’ahandi hagiye hatandukanye, ariko impamvu nyamukuru yo gutera inkunga icyo gikorwa kibera mu Rwanda ngo ni ukugira ngo afashe u Rwanda kumenyekana, ndetse n’abana b’Abanyarwanda barusheho gukunda igitabo gitagatifu cya Korowani.

Abanyarwanda bakunze kwiharira intsinzi muri ayo marushanwa kuri ubu akaba arimo kuba ku nshuro yayo ya munani.