Umunyamabanga nshingwabikorwa w’intara y’uburengerazuba, Jabo Paul yashimiye aka karere imbaraga gashyira mu guteza imbere imiyoborere myiza ibyo ngo bigaragazwa n’uko bahuriza hamwe abaturage bakabamurikira ibikorwa byabo birimo imigambi ubuyobozi bubafitiye mu iterambere ryabo n’iry’igihugu muri rusange.

Alex Afurika, umukozi w’ikigo cy’igihugu gishinzwe imiyoborere (RGB) yashimiye ko inzego zose zaba iza Leta n’izabikorera basigaye basenyera umugozi umwe bakuzuzanya mu bikorwa by’iterambere.

Yasabye ubuyobozi bw’akarere ka Rusizi gukomeza umurongo bafite wo gushimangira umuco w’imiyoborere myiza anashimira umukuru w’igihugu Nyakubahwa Paul Kagame wimakaje umuco w’imiyoborere myiza mu Rwanda ubu igihugu kikaba kiri gutera imbere mu buryo bwihuse.

Abitabiriye imurikabikorwa barimo Uzayisenga Marie baravuga ko kubahuriza hamwe ari igikorwa cy’ingenzi kuko gituma bamwe bigira ku byo bagenzi babo bakora bakabasha gutera imbere, mu byifuzo byabo ngo ni uko igikorwa cy’imurikabikorwa cyajya gihuzwa n’imurikagurisha kuko aribyo byatuma barushaho gutera imbere.

Imurikabikorwa ry’akarere ka Rusizi ryatangiye kuwa 22/10/2014 risozwa kuri uyu wa gatanu, rikaba ryari ryitabiriwe n’abafatanyabikorwa batandukanye baje kumurika ibikorwa byabo.

Musabwa Euphrem