Ibi abaturage babitangaje nyuma y’igihe kinini bagerageza gusana umuhanda Buhanda-Ruhango na Buhanda-Byimana. Iyi mihanda yatangiye kwangirika kuva ibihe by’imvura byatangira, abaturage bagerageje kuhakora imiganda ariko ngo bigenda birushaho kurenga ubushobozi bwabo.

Umuhanda Buhanda-Ruhango usigaje akantu gato ugacika.

Mu mudugudu wa Munini akagari ka Buhanda umurenge wa Bweramana, umuhanda uburaho akantu gato cyane ngo ucike. Umuturage witwa Uwimana Epiphanie yagize ati “n’ukuri turasaba inzego zibishinzwe ko twatabarwa uyu muhanda ugakorwa mu maguru mashya, ubuse wowe urabona utarangiye?”

Umunyamabanga nshingwabikorwa w’umurenge wa Bweramana, Uwamahoro Christine, avuga ko bagerageje gukora imiganda myinshi ndetse ngo bagerageza kuyobya amazi yazaga ari menshi asatira uyu muhanda ariko biranga.

Abaturage bareba uko umuhanda wabo wangiritse.

Ubu ngo icyo ubuyobozi bw’umurenge bwakoze bwabimenyesheje akarere kugirango nako kabe kabakorera ubuvugizi mu zindi nzego; nk’uko Uwamahoro yakomeje abitangaza.

Si uyu muhanda ugaragaramo iki kibazo gusa, kuko umuhanda uhuza aka gasantire ka Buhanda na Byimana naho wangiritse cyane, abantu bawukoreshaga bakaba bari basigaye babanza kuzenguruka bakanyura muri uyu wa Ruhango nawo umaze kwangirika.

Iyi tagisi irahagarara abagenzi bakabanza bakavamo kugirango uburemere bube buke.

Ibibazo by’umuhanda nanone ubisanga mu muhanda uhuza Ruhango na Kinazi nawo amazi yabayemo menshi kuburyo ubugenderanire busa nk’aho bwahagaze.

Ubuyobozi bw’akarere ka Ruhango buvuga ko ikibazo cy’iyi mihanda bukizi, ngo nabwo bwakoze ibyo bwagombaga gukora kuko bwafatanyije n’abaturage mu bikorwa by’imiganda.

Umuhanda wa Byimana-Buhanda nawo warangiritse.

Ubu ngo nabwo butegereje icyo minisiteri y’ibikorwa remezo izakora; nk’uko bitangazwa na Twagirimana Epimaque umuyobozi w’akarere ka Ruhango wungirije ushinzwe imari n’ubukungu.

Eric Muvara