Ubwo umunyamakuru wa Kigalitoday yajyaga ku mupaka uhuza Goma na Gisenyi uzwi ku izina rya Grande barrier mu karere ka Rubavu, tariki 16/05/2012, yahasanze impunzi zigera kuri 20 zihungiye mu Rwanda.

Muri izo mpunzi harimo izari zahageza mu gitondo uwo munsi ndetse n’izari zikihagera muri mu masaha ya saa sita z’amanywa. Iyo witegereje ku ruhande rw’aho zakirirwa, usanga hahagaze imodoka ya polisi izwi ku izina rya “Panda gare” ndetse n’abakozi ba MIDIMAR nabo baba bita kuri izi mpunzi.

Zimwe mu izo mpunzi zatangaje ko zishima cyane polisi y’igihugu n’abaturage, uburyo bakomeje kuzakirana umutima wa kimuntu ndetse n’uburyo by’umwihariko polisi y’igihugu iri kubafasha kubageza kwa muganga cyane ku bari kuza bafite intege nke z’uburwayi n’ihohoterwa bakorewe.

Umwe mu babyeyi wari ufite abana batatu n’imizigo yagize ati “ni ubwa mbere mbonye abantu bagikunda abandi. Muri Kongo iyo za Masisi aho nturutse n’urubyaro rwanjye ndakurahiye iyo bakubonye niyo waba usamba ahubwo barakurangiza. Ariko reba ukuntu polisi y’aha i Rwanda intwaje imitwaro ndetse n’uriya murwayi akaba ajyanywe kwa muganga”.

Abaturage b’akarere ka Rubavu baturiye uyu mupaka usanga bari gufatanya na polisi y’igihugu kwita kuri izi mpunzi. Bavuga ko kuba bari gufasha izi mpunzi ari umuco w’Abanyarwanda, kuko nabo bazirikana amahano banyuzemo kandi ngo gufashanya ni imwe mu ndangagaciro z’Abanyarwanda.

Jean Claude Rwahama, ushinzwe ibibazo by’impunzi muri Minisiteri ifite kwita ku mpunzi mu nshingano zayo (MIDIMAR) yasobanuye ko batazahwema kwakira impunzi zizaza zibagana ndetse ko biteguye no kujya bafasha abazaza bahuye n’ibibazo bitandukanye mu nzira.

Magingo aya impunzi zisaga 8270 zibarurwa kuba zimaze kugera mu nkambi ya Nkamira mu karere ka Rubavu kandi impunzi z’Abanyekongo zikomeje kuza mu Rwanda ku bwinshi.

Védaste Nkikabahizi